2030 jylǵa qaraı sý únemdeý tehnologııalary qoldanylatyn alqaptar 1,3 mln gektar bolady
ASTANA. KAZINFORM- Qazaqstan 2030 jylǵa qaraı sý únemdeý tehnologııalary qoldanylatyn sýarmaly alqaptardyń kólemin 1,3 mln gektarǵa jetkizýdi maqsat etip otyr. Bul jyl saıyn 2,2 mlrd tekshe metrge deıin sý únemdeýge múmkindik beredi dep boljanyp otyr, dep habarlaıdy QR Aýyl sharýashylyǵy mınıstrliginiń baspasóz qyzmeti.
Osy baǵyttaǵy halyqaralyq yntymaqtastyqty damytý úshin Qazaqstan Shanhaı yntymaqtastyq uıymy (ShYU) aıasynda sýdy únemdeý tehnologııalary boıynsha tájirıbe almasatyn óńirlik platforma qurý múmkindigin qarastyrýdy usyndy.
Bul týraly QR Aýyl sharýashylyǵy vıtse-mınıstri Nazgúl Hatepova Qytaıdyń Shensı provıntsııasynda ótken 33-shi ıAnlın aýyl sharýashylyǵy kórmesi aıasyndaǵy ShYU-nyń zamanaýı aýyl sharýashylyǵyn damytý jónindegi 2026 jylǵy dóńgelek ústelinde aıtty.
Qazaqstan tarapy usynǵan óńirlik platformaǵa uıymǵa múshe memleketterdiń tıisti memlekettik organdaryn, ǵylymı-zertteý ınstıtýttaryn, agrarlyq joǵary oqý oryndaryn, jabdyq óndirýshilerin jáne aýyl sharýashylyǵy taýaryn óndirýshilerin tartý kózdelip otyr. Mundaı alań tıimdi agrotehnologııalardy keńinen taratýǵa, birlesken ǵylymı zertteýler men dalalyq synaqtar júrgizýge, ǵylymı ázirlemelermen almasýǵa jáne aýyl sharýashylyǵy salasyna qajetti mamandar daıarlaýǵa múmkindik beredi.
Yntymaqtastyqtyń basym baǵyttaryna tamshylatyp jáne jańbyrlatyp sýarý júıelerin engizý, dálme-dál eginshilik tehnologııalaryn damytý, topyraq ylǵaldylyǵyn tsıfrlyq baqylaý, sýarýdy avtomatty basqarý júıelerin jetildirý, sýarmaly jerlerdiń tuzdanýynyń aldyn alý jáne aýyl sharýashylyǵy óndirisiniń klımat ózgerisine tózimdiligin arttyrý kiredi.
-ShYU elderiniń aýyl sharýashylyǵy salasynda ǵylymı bilimdi, ozyq tehnologııalardy, ınvestıtsııalar men tájirıbeni biriktirýge mol múmkindik bar. Bizdiń ortaq mindetimiz — jańa ázirlemelermen almasyp qana qoımaı, olardy ár eldiń tabıǵı-klımattyq erekshelikteri men aýyl sharýashylyǵy óndirýshileriniń qajettilikterin eskere otyryp, is júzinde qoldaný. Sýdy únemdeý tehnologııalary salasyndaǵy áriptestikti nyǵaıtý agroónerkásiptik keshenniń turaqtylyǵyn arttyryp, ShYU-ǵa múshe memleketterdiń azyq-túlik qaýipsizdigin qamtamasyz etýge úles qosady dep senemiz, — dep atap ótti Nazgúl Hatepova.
Jumys sapary aıasynda qazaqstandyq delegatsııa 33-shi ıAnlın aýyl sharýashylyǵy kórmesiniń birneshe pavılonyn aralady. Olardyń qatarynda halyqaralyq aýyl sharýashylyǵy yntymaqtastyǵy men tájirıbe almasý kórmesi, aýyl sharýashylyǵyndaǵy joǵary tehnologııalyq jetistikter men jańa óndiristik sheshimder kórmesi, sondaı-aq aýyl sharýashylyǵy tehnıkasy men jabdyqtarynyń halyqaralyq kórmesi boldy.
Delegatsııa músheleri aýyl sharýashylyǵy mashınalaryn jasaý salasyndaǵy jańa ázirlemelermen, ınnovatsııalyq tehnologııalarmen jáne agrarlyq óndiristiń tıimdiligin arttyrýǵa baǵyttalǵan zamanaýı sheshimdermen tanysty.
Osyǵan deıin Qazaqstanda sý ınfraqurylymyn damytýǵa 192,6 mlrd teńge baǵyttalǵany týraly jazdyq.
