2030 jylǵa qaraı ózbekstandyqtar álemniń 50 eline vızasyz saparlaı alady

TAShKENT. KAZINFORM — Ózbekstan bıligi 2030 jylǵa qaraı ózara vızasyz saıahattaı alatyn memleketterdiń sanyn 50-ge deıin ulǵaıtýdy josparlap otyr, dep habarlaıdy Kazinform agenttiginiń menshikti tilshisi. 

Mundaı mindet 2026-2030 jyldarǵa arnalǵan jańartylǵan damý strategııasynyń jobasynda jazylǵan. Atap aıtqanda, bıyl 2 elmen, al 2027 jyly 5 memleketpen ózara vıza rejımin alyp tastaıtyn kelisimder jasaý kózdelip otyr.

Tıisinshe, 2028 jyly vızasyz saıahattaýǵa bolatyn elderdiń sany 45-ke jetedi. Keıin, ıaǵnı 2030 jylǵa qaraı olardyń qataryn 50-ge deıin kóbeıtý josparlanǵan.

Sonymen qatar, Syrtqy ister mınıstrliginiń aldyna 4 jyl ishinde ózbekstandyqtarǵa jeńildetilgen tártippen barýǵa bolatyn memleketterdiń sanyn 60-qa deıin jetkizý mindeti qoıylǵan.

Eske salaıyq, bıyl 1 qańtardan bastap Ózbekstan AQSh azamattary úshin 30 kúndik vızasyz rejım engizdi.

Buǵan deıin habarlaǵanymyzdaı, Ózbekstan men Qytaı arasynda vızasyz rejım engizýge baǵyttalǵan kelisim byltyr maýsymda kúshine engen bolatyn.