2030 jylǵa qaraı Ózbekstanda sý tapshylyǵy 15 mlrd tekshe metrge jetedi
TAShKENT. KAZINFORM – 2030 jylǵa qaraı Ózbekstandaǵy sý tapshylyǵy 15 mlrd tekshe metrge jetedi. Bul týraly BUU-nyń Nıý-Iorktegi shtab-páterinde ótip jatqan saıası forým aıasynda Kun.uz agenttigine suhbat bergen Sý sharýashylyǵy mınıstri Shavkat Hamraev málimdedi, dep habarlaıdy Kazinform agenttiginiń Tashkenttegi menshikti tilshisi.
- Sý tapshylyǵy - óte kúrdeli másele. Bıyl jaýyn-shashyn mol túsip, jaǵdaıdy turaqtandyrýǵa oń áser etti. Táýelsizdik jyldarynda biz ózenderden burynǵyǵa qaraǵanda 10-12 mlrd tekshe metrge az sý alyp kelemiz. 2030 jylǵa qaraı respýblıkadaǵy sý tapshylyǵy 15 mlrd tekshe metrge jetedi. Sondyqtan qazirdiń ózinde sýdy únemdep, tamshylatyp sýarý tehnologııasyn keńinen engizý qajet, - dedi Shavkat Hamraev.
Ol atap ótkendeı, bıyl jalpy memlekettik bıýdjet qarajatynyń 4-4,2%-y dál osy sektordy damytýǵa bólingen.
- Klımattyń ózgerýi, jaýyn-shashynnyń azaıýy jáne ózen arnalarynyń tartylýy saldarynan elimizdegi sý tapshylyǵy deńgeıi 169%-ǵa jetken edi. Alaıda 2017-2022 jyldar aralyǵynda ony 122%-ǵa deıin tómendete aldyq, ıaǵnı 47%-ǵa qysqarttyq. Osy jyldyń qorytyndysy boıynsha bul kórsetkish 117%-ǵa deıin tómendeıdi. Al 2030 jylǵa qaraı sý tapshylyǵy deńgeıin 95%-ǵa deıin túsiremiz. Qazirdiń ózinde biz jyl saıyn 11 mlrd tekshe metr sýdy únemdep kelemiz, - dedi mınıstr.
Eske salaıyq, buǵan deıin Kazinform agenttigi sý tapshylyǵy problemasy Ortalyq Azııa elderin biriktiretin quralǵa aınalyp jatqany týraly jazyp edi.
Qosa ketsek, ózbekstandyq sarapshylardyń boljamyna saı, 2030 jylǵa qaraı aımaq elderi aýyz sý tapshylyǵyn sezinýi múmkin.
