2030 jylǵa qaraı qolda bar sý resýrstary 2,4 tekshe shaqyrymǵa ulǵaıtylady
ASTANA. KAZINORM – 2030 jylǵa qaraı sýarmaly jerlerdiń aýmaǵy 2,5 mln gektarǵa ulǵaıtylady. Bul týraly Úkimet otyrysynda Sý resýrstary jáne ırrıgatsııa mınıstri Nurjan Nurjigitov aıtty.
«Sizderdiń qaraýlaryńyzǵa 2024-2030 jyldarǵa arnalǵan sý resýrstaryn basqarý júıesin damytý tujyrymdamasynyń jobasy shyǵarylady. Jalpy alǵanda, ekonomıkanyń sý sektoryndaǵy jaǵdaı memlekettiń sý sharýashylyǵy saıasatyn jáne salany basqarýdy túbegeıli jetildirýdi, qalyptasqan qurylymdy qaıta qaraýdy, sý sharýashylyǵy sýbektileriniń fýnktsııalaryn bólýdi, ekonomıkalyq qatynastardyń jańa tetikterin ázirleýdi talap etedi», - dedi mınıstr.
Onyń atap ótýinshe, eldiń sý qaýipsizdigin qamtamasyz etý jáne sý tapshylyǵyn azaıtý maqsatynda 20 sý qoımasyn salý, 15 sý qoımasyn rekonstrýktsııalaý, 14 myń shaqyrymnan astam ırrıgatsııalyq kanaldardy jańǵyrtý jáne gıdrotehnıkalyq qurylystardy rekonstrýktsııalaý boıynsha birqatar shuǵyl is-shara kózdelip otyr.
«Josparlanǵan tásilderdi iske asyrý sýdy tasymaldaý kezinde ónimsiz shyǵyndardy 50-den 25 paıyzǵa deıin azaıtý arqyly 2030 jylǵa qaraı sýarmaly jerlerdiń aýmaǵyn 2,5 mln gektarǵa deıin jáne qolda bar sý resýrstaryn 2,4 tekshe shaqyrymǵa ulǵaıtýǵa, sondaı-aq ekonomıka salalaryn kepildendirilgen sýmen qamtamasyz etý úshin gıdrotehnıkalyq qurylystardyń jaı-kúıin jaqsartýǵa jáne tótenshe jaǵdaılardyń týyndaý qaýpin azaıtýǵa múmkindik beredi», - dedi Nurjan Nurjigitov.
