2030 jylǵa qaraı Eýropada júrgizýshi kýálikteri smartfonǵa kóshiriledi

ASTANA. KAZINFORM — Eýropalyq odaq júrgizýshi kýálikteri júıesinde tsıfrlyq revolıýtsııaǵa daıyndalyp jatyr, dep habarlaıdy AZERTADJ.

Eýropalyq parlament barlyq EO elderinde júrgizýshi kýálikterin alý jáne paıdalaný tártibin ózgertetin aýqymdy reformany bekitýge jaqyn tur.

2030 jylǵa qaraı smartfonda saqtaýǵa bolatyn tsıfrlyq júrgizýshi kýálikteri engiziledi. Plastık kartalar da saqtalady, biraq tek ıesiniń ótinishi boıynsha ǵana.

Negizgi jańalyqtardyń biri — 17 jastaǵy júrgizýshilerge úlkenderdiń qadaǵalaýymen B sanatyndaǵy avtokólikti basqarýǵa ruqsat berý. C sanatyndaǵy júk kóligin oqytýǵa da osyndaı ereje usynylyp jatyr. Osylaısha, Eýropalyq odaq jastarǵa júrgizý tájirıbesin alýdy jeńildetip, jol qaýipsizdigin arttyrýdy maqsat etedi.

65 jastan asqan júrgizýshilerge qatysty birtutas talaptar bolmaıdy — ár el óz sheshimimen olardan dárigerlik tekserý nemese qaıtadan oqý kýrstarynan ótý kerek pe, joq pa sony belgileıdi.

Sonymen qatar reforma «Eýropa boıynsha bir jaza» qaǵıdatyn da engizedi: eger júrgizýshi bir EO elinde kýáliginen aıyrylsa, ol basqa eshbir elde kólik basqara almaıdy. EO elderi zańnamany beıimdeýge daıyndyq júrgizip jatar.

Tsıfrlyq kýálikterdi synaqtan ótkizý 2027–2028 jyldarǵa josparlanǵan.

Sarapshylar bul bastama bıýrokratııany azaıtyp, Eýropa ishindegi júrgizýshi qujattaryna degen senimdilikti arttyrady dep esepteıdi.

Osydan buryn Ispanııa premer-mınıstri Pedro Sanches Eýropalyq Odaqty maýsymdyq ýaqytty ózgertý tájirıbesinen túbegeıli bas tartýǵa shaqyrdy.