2030 jylǵa qaraı elimizde 7 myń traktorshy, 9,5 myń prorab kerek bolady – vıtse-premer
ASTANA. KAZINFORM – Premer-mınıstrdiń orynbasary Ermek Kósherbaev Senatta ótip jatqan parlamenttik tyńdaýda 2030 jylǵa qaraı qaı salalarda jumysshy mamandar tapshy bolatynyn aıtty.
- Tehnologııalardyń enip, avtomattandyrý artqanyna qaramastan jumysshy kásipter áli de eńbek naryǵynyń negizi bolyp qala beredi. Aldaǵy jyldary ondaı mamandarǵa qajettilik tek arta túsedi. Aldaǵy 6 jylda jumys kúshine degen jıyntyq suranys 1,6 mln adamǵa baǵalanyp otyr. Olardyń jartysynan kóbi kásiptik-tehnıkalyq bilimi bar mamandar bolý kerek. 400 myńǵa jýyq taza jumysshy kerek bolady, - dedi ol.
Ermek Kósherbaevtyń sózinshe, jumysshy mamandyqtarǵa eń kóp suranys qurylys, aýyl sharýashylyǵy, óńdeý ónerkásibi jáne densaýlyq saqtaý salalarynda boljanyp otyr.
- Bul salalarda jumysshy mamandarǵa suranys 56 paıyz bolady. Qurylysta sylaqshyǵa (9758 adam), prorabqa (9477 adam), dánekerleýshige (7229 adam)suranys joǵary bolady. Aýyl sharýashylyǵynda fermerlerge (9695 adam), traktorshylarǵa (7141 adam), iri qara mal ósirýmen baılanysty jumysshylarǵa suranys joǵary bolmaq. Óńdeý ónerkásibinde dánekerleýshiler, tiginshiler men kıim restavratorlary, ónerkásip jabdyqtarynyń slesarlary, santehnıkter men qubyr ótkizgishter qajet. Densaýlyq saqtaý salasynda 24 614 orta medıtsınalyq personal, 4604 jedel járdem kóligin júrgizýshi, 4536 feldsher kerek bolady. Óńirler boıynsha jumysshy mamandyqtarǵa eń úlken suranys Qaraǵandy, Túrkistan, Jambyl jáne Almaty oblystarynda bolady, - dedi vıtse-premer.
Eske salsaq, Shyǵys Qazaqstan oblysyndaǵy toǵyz kásiporyn 304 jumysshysyna 150 mln teńge jalaqy tólemegeni málim bolǵan edi.