2030 jylǵa qaraı elektr qýatynyń 15 paıyzyn jańartylatyn energııa kózderinen alamyz – Toqaev
ASTANA. KAZINFORM – Qazaqstan 2030 jylǵa qaraı iri energetıkalyq nysandardan aýaǵa taraıtyn zııandy shyǵaryndylardy 35 paıyzǵa azaıtady. Bul týraly Óńirlik ekologııalyq sammıtte Memleket basshysy Qasym-Jomart aıtty.
- Qazirgi ýaqytta Qazaqstanda elektr qýatynyń 7 paıyzdan astamy jańartylatyn energııa kózderinen alynady. 2030 jylǵa qaraı bul kórsetkishti 15 paıyzdan asyrýdy josparlap otyrmyz. Biz munaı-gaz qory mol memleketterdiń qataryna kiremiz. Soǵan qaramastan, elimiz ornyqty energetıka maqsattarynan aınymaıdy, - dedi Qasym-Jomart Toqaev.
Memleket basshysy álemdik ýran eksportynyń shamamen 40 paıyzyn qamtamasyz etetin Qazaqstan kómirteksiz elektr energetıkasyn damytýdy quptaıtyndyǵyn basa aıtty.
- Búginde alǵashqy atom elektr stantsııasynyń jobasyn pysyqtap jatyrmyz. Sonymen qatar «taza kómir» tehnologııasy negizinde jylý elektr stantsııalaryn jańǵyrtýdy qolǵa aldyq. Osylaısha, iri energetıkalyq nysandardan aýaǵa taraıtyn zııandy shyǵaryndylardy 35 paıyzǵa azaıtamyz, - dedi Prezıdent.
Aıta keteıik, birneshe eldiń Prezıdenti qatysyp jatqan Óńirlik ekologııalyq sammıt «Ornyqty bolashaqqa ortaq kózqaras» taqyrybymen ótýde.
