2030 jylǵa qaraı densaýlyq saqtaý mamandaryna tapshylyq artady
ASTANA. KAZINFORM – Qazaqstan densaýlyq saqtaý menedjerleri qaýymdastyǵy keńesiniń tóraǵasy Qýanysh Erǵalıev densaýlyq saqtaý salasyndaǵy boljamdardy baıandady. Aıta keteıik, elordada Densaýlyq saqtaý menedjerlerin daıyndaý máseleleri týraly dóńgelek ústel ótti.
«Qazir densaýlyq saqtaý salasynda halyq sanynyń ósýi, jańa medıtsınalyq tehnologııalardyń paıda bolýy sııaqty túrli kúrdeli synaqtarǵa tap bolyp otyrmyz. Bul qıyndyqtardy jeńý úshin bizge kúrdeli júıelerdi basqarýǵa jáne durys sheshimder qabyldaýǵa qabiletti, joǵary bilikti menedjerler men basqarýshylar qajet. Joǵary oqý oryndary, kásibı qaýymdastyqtar jáne medıtsınalyq uıymdardyń basshylary arasynda menedjerlerdi daıarlaýdyń úzdiksiz protsesi máseleleri biz úshin de mańyzdy», - dedi Densaýlyq saqtaý mınıstri Aqmaral Álnazarova.
Qýanysh Erǵalıevtiń aıtýynsha, densaýlyq saqtaý júıesindegi negizgi jahandyq syn-qater – medıtsına qyzmetkerleriniń tapshylyǵy bolady.
«2030 jylǵa qaraı densaýlyq saqtaý júıesinde 10 mıllıonǵa jýyq adam jetispeıdi dep boljanýda. Bul derek Dúnıejúzilik ekonomıkalyq forýmda aıtyldy. Ekinshi syn-qater –qarjylyq júkteme. Jahandyq deńgeıde barlyq elder boıynsha qarjylandyrý artqanyn kórip otyrmyz, biraq densaýlyq saqtaý júıesi úlgermeıdi, densaýlyq kórsetkishteri de jaqsarǵan joq. Qazaqstanda áleýmettik medıtsınalyq saqtandyrýdy engizý arqyly qarjylandyrý 3 ese ósti, biraq densaýlyq kórsetkishteri esh dınamıkany kórsetpedi», - dedi Q. Erǵalıev.
Sonymen birge, spıker medıtsınalyq qyzmetterge qol jetkizýdegi teńsizdiktiń artqanyn da atap ótti.
«Ásirese muny pandemııadan keıin kórdik. Densaýlyq saqtaý júıesinde teńsizdik máseleleri shıelenise tústi. Medıtsınalyq qyzmetterge qol jetkize almaıtyn adamdar sany artty, halyqtyń kedeı jáne margınaldy toptary zardap shegedi», - dedi ol.
Juqpaly emes aýrýlar densaýlyq saqtaý júıesinde de úlken aýyrtpalyq týdyrýda.
«Juqpaly emes sozylmaly aýrýlardan bolatyn ólim-jitim úlesi aldaǵy ýaqytta tek qana ósedi. Qazir ólim-jitim shamamen 74% qurasa, 2030 jylǵa qaraı jahandyq ólim-jitim 80%-dan asady, ásirese damýshy elderde kóbirek baıqalady. Biraq juqpaly aýrýlar da nazarymyzdan túspeýi kerek. Buǵan COVID-19 dálel», - deıdi Qýanysh Elikbaev.
