2030 jylǵa qaraı aımaq elderi aýyz sý tapshylyǵyn sezinýi múmkin – ózbekstandyq sarapshy
TAShKENT. KAZINFORM – 2030 jylǵa qaraı aımaq elderi aýyz sýdyń aıtarlyqtaı tapshylyǵyn sezinýi múmkin. Muny Tashkentte ótken sarapshylar basqosýynda Ózbekstan Sý sharýashylyǵy mınıstrligine qarasty Irrıgatsııa jáne sý máseleleri jónindegi ǵylymı-zertteý ınstıtýtynyń aǵa ǵylymı qyzmetkeri Andreı Petrov málimdedi, dep habarlaıdy Kazinform agenttiginiń Tashkenttegi menshikti tilshisi.
- Barlyǵymyz biletindeı, bizdiń óńirde muzdyqtardyń tez erýine baılanysty sý jyl saıyn azaıyp barady. 2030 jylǵa qaraı aımaq elderi aýyz sýdyń aıtarlyqtaı tapshylyǵyn sezinýi múmkin. Sondyqtan búgingi is-shara ortaq ustanymdardy taǵy bir saralap, máseleniń teris áserin barynsha azaıtý boıynsha kúsh-jigerlerdi úılestirýge baǵyttalǵan, - dedi Andreı Petrov BAQ ókilderiniń saýalyna jaýap bere otyryp.
Spıker dóńgelek ústelde tóbe kórsetken Aýǵanstan ókilderiniń sý dıplomatııasyna qyzyǵýshylyq tanytqanyn joǵary baǵalady. Sarapshynyń paıymynsha, bul barlyq taraptyń ulttyq múddesin eskere otyryp, Ámýdarııa ózeniniń sýyn tıimdi ári teń bólý úrdisin júıeleýge yqpal etedi.
Eske salaıyq, osy is-sharada sóz sóılegen Ortalyq Azııa halyqaralyq ınstıtýtynyń dırektory Javlon Vahabov óńirdegi sý tapshylyǵy aldaǵy jyldary ekonomıkanyń damýyn tejeıtin negizgi faktorǵa aınalatynyn atap ótti.
Buǵan deıin habarlaǵanymyzdaı, bıyl sáýirde elordada ótetin Óńirlik ekologııalyq sammıtinde Ortalyq Azııa elderiniń basshylary Astana deklaratsııasyna qol qoıady.
Qosa ketsek, aldaǵy ýaqytta Ózbekstan jasandy jolmen jańbyr jaýdyrý tehnologııasyn engizýdi kózdep otyr.
Munymen birge Ózbekstan 2028 jylǵa deıin alqaptardyń 80%-yna sý únemdeý tehnologııalaryn engizbek.
Taıaýda Kazinform agenttigine Sý resýrstary jáne ırrıgatsııa mınıstri Nurjan Nurjigitov málim etkendeı, qazirgi ýaqytta Qazaqstan men Ózbekstan Syrdarııa ózenine sýdy esepke alatyn qurylǵylardy ornatyp jatyr.
