2030 jylǵa qaraı Aqmola oblysynda mektep tapshylyǵy 13 myń orynǵa jetýi múmkin

ASTANA. KAZINFORM – Premer-mınıstr Oljas Bektenov Senat depýtatynyń saýalyna bergen jaýapta Aqmola oblysyndaǵy mektep tapshylyǵyn memleket-jekemenshik áriptestigi aıasynda sheshý josparlanyp otyrǵanyn málim etti.

- Sizderdiń saýaldaryńyzda 9 000 oqýshyǵa arnalǵan 8 mektep salý qajettigi týraly másele kóterilgen bolatyn. Qazaqstan Respýblıkasy Oqý-aǵartý mınıstrligi men Aqmola oblysynyń ákimdigi jańa mektepterge 2030 jylǵa deıingi suranysqa jan-jaqty taldaý júrgizdi.

Demografııalyq ósimniń turaqty qarqyny men elordamen shekaralas aımaqtyń belsendi damýyna baılanysty oqýshylar sanynyń artýy kútilýde. Júrgizilgen esep-qısapqa sáıkes 2030 jylǵa qaraı oqýshylar kontıngenti shamamen 153 myń adamǵa, al oqýshy oryndarynyń tapshylyǵy 13 myńǵa deıin jetýi yqtımal, - dep jazylǵan jaýapta.

Úkimet bul problemany sheshý úshin memleket-jekemenshik áriptestigi tetigin engizbekshi.

- Respýblıkalyq bıýdjet qarajaty shekteýli bolǵandyqtan, jobany qazirgi kezeńde bıýdjet esebinen iske asyrý múmkin emes. Osyǵan baılanysty memleket-jekemenshik áriptestigi balama retinde qarastyrylyp otyr. Ol bıýdjetten tys qarjy kózderin tartýǵa, memleket qarajatyna túsetin júktemeni azaıtýǵa jáne jobany neǵurlym jedel iske asyrýǵa múmkindik beredi, - deıdi Premer-mınıstr.

Atalǵan áriptestik tetigi mynandaı negizgi sharttarǵa negizdelmek:

- balalarǵa 100% tegin bilim berý;

- Orta bilim berýdiń jan basyna shaqqandaǵy normatıvtik qarjylandyrý ádistemesine sáıkes amortızatsııalyq komponent tólemi;

- memlekettik tapsyrystyń kepildendirilgen kólemi;

- jobalyq qýatty ákimdiktiń oqýshy oryndaryna naqty suranysqa súıene otyryp aıqyndaý múmkindigi;

- ákimdiktiń jer ýchaskesin, jobalyq-smetalyq qujattamany jáne ınjenerlik kommýnıkatsııalar men ınfraqurylymdy qamtamasyz etýi.

Buǵan deıin Qazaqstan mektepterine Google for Education ekojúıesin engizý boıynsha pılottyq joba bastalǵanyn jazǵan edik.