2030 jylǵa qaraı agroónerkásip keshenine 63 myń maman qajet bolady
ASTANA. KAZINFORM — 2030 jylǵa qaraı agroónerkásip keshenine 63 myń maman qajet bolady. Bul týraly Senat depýtattarynyń saýalyna Premer-mınıstr Oljas Bektenovtiń jaýabynda aıtylǵan.
— Eńbek jáne halyqty áleýmettik qorǵaý mınıstrliginiń 2030 jylǵa deıingi orta merzimdi boljamyna sáıkes, 883 myń maman, onyń ishinde agroónerkásip kesheninde 63 myń adam nemese 7 qajet bolady. Aıta keterligi, agroónerkásip keshenine qajetti mamandardyń 88 paıyz biliktiligi joq nemese jumysshy kadrlar, al 12 paıyzy — joǵary bilimdi mamandar (7,6 myń adam). Bul rette aýyl sharýashylyǵy salasyna kadrlar daıarlaýǵa arnalǵan memlekettik tapsyrys kólemi jyl saıyn artyp keledi. 2025 jyly «Aýyl sharýashylyǵy jáne bıoresýrstar» baǵyty boıynsha 3 018 grant qarastyrylǵan, bul 2024 jylmen salystyrǵanda 67 grantqa artyq. «Veterınarııa» baǵyty boıynsha 1 451 grant bólingen, bul 2024 jylmen salystyrǵanda 271 grantqa kóp, — dedi Úkimet basshysy.
Onyń atap ótýinshe, 2021 jyly aýyldyq kvota mólsheri 30-dan 35 paıyzǵa deıin ulǵaıtyldy. Al agrarlyq mamandyqtar úshin UBT-nyń eń tómengi shekti baly 60-tan 50 balǵa deıin tómendetildi.
— Buǵan qosa, 2023 jyldan bastap jergilikti atqarýshy organdar «Aýyl sharýashylyǵy jáne bıoresýrstar» baǵyty boıynsha 310 grant jáne «Veterınarııa» baǵyty boıynsha 92 grant bóldi. Jalpy, «Aýyl sharýashylyǵy jáne bıoresýrstar», «Veterınarııa» baǵyttary boıynsha memlekettik tapsyrys kólemi jáne agroónerkásip kesheniniń mamandarǵa qajettiligi 2026–2027 oqý jylyna arnalǵan memlekettik bilim berý tapsyrysyn bólý jónindegi respýblıkalyq komıssııada Parlament depýtattarynyń qatysýymen belgilengen tártipte qaralady, — dedi Oljas Bektenov.
Buǵan deıin Májilis depýtattary agrarlyq mamandyq stýdentteriniń shákirtaqysyn kóterýdi usynǵan edi.