2030 jylǵa deıingi kómir generatsııasyn damytý jospary tanystyryldy
ASTANA. KAZINFORM — Memleket basshysynyń tapsyrmasyna sáıkes, QR Úkimeti Energetıka mınıstrligi arqyly kómir generatsııasyn damytý jónindegi ulttyq jobany ázirlep jatyr, dep habarlaıdy vedomstvonyń baspasóz qyzmeti.
Energetıka mınıstrligi dóńgelek ústel otyrysynda sarapshylyq qaýymdastyqqa 2030 jylǵa deıingi kómir generatsııasyn damytý jónindegi Ulttyq jospardyń jobasyn tanystyrdy.
Jobanyń bastapqy quny 8 trln teńgeden asady dep baǵalanyp otyr. Ulttyq jospar eldegi energııa tapshylyǵyn sheshýge jáne eskirgen stansalardy jańartýǵa baǵyttalǵan.
— Ulttyq joba saladaǵy barlyq baǵytty keshendi ári jan-jaqty damytýǵa baǵyttalǵan. Bul ınvestıtsııa tartýdan bastap, otyn-logıstıkalyq ınfraqurylymdy damytýǵa jáne kadrlyq áleýetti kúsheıtýge deıingi teńdestirilgen tásil. Mundaı júıeli ádis ekonomıkanyń mýltıplıkatıvtik áserin qamtamasyz etip, eldiń turaqty damýyna úles qosady, — dedi Energetıka mınıstri Erlan Aqkenjanov.
Josparǵa alty iri energetıkalyq nysannyń qurylysy kiredi: Ekibastuz MAES-3 (GRES), sondaı-aq Kýrchatov, Kókshetaý, Semeı, Óskemen jáne Jezqazǵan stansalary.
Sonymen qatar, Ekibastuz MAES-2 jáne Aqsý MAES sııaqty jumys istep turǵan stansalardy tehnıkalyq jańǵyrtý qarastyrylǵan. Jańa jobalardy júzege asyrý úshin ınvestorlardy tender arqyly tańdaý mehanızmderi qoldanylady. Al qoldanystaǵy stansalardy jańartý úshin mınıstrlikpen ınvestıtsııalyq kelisimder jasalady. Bul sharalar jobany iske asyrý protsesiniń ashyqtyǵyn qamtamasyz etip, uzaqmerzimdi kelisimder sheńberinde boljanatyn tarıfterdi saqtaı otyryp, ınvestıtsııalardyń qaıtarymdylyǵyn qamtamasyz etedi.
— Jobada basty nazar «taza kómir» negizindegi nysandarǵa, zamanaýı tehnologııalardy qoldanýǵa aýdarylǵan. Bizdiń maqsat — moraldyq jáne fızıkalyq eskirgen qýattardy joǵary tıimdilik koeffıtsıentine ıe zamanaýı energetıkalyq bloktarmen kezeń-kezeńimen almastyrý. Bul ekologııalyq talaptar men energetıkalyq qaýipsizdik arasyndaǵy tepe-teńdikti saqtaýǵa múmkindik beredi, — dedi vedomstvo basshysy.
Jańa qýattardy tıimdi engizý úshin kómir óndirý jáne temirjol ınfraqurylymyn damytý josparlaryn úılestirý qajet. Mınıstrlik kómir óndirisin ulǵaıtý jáne temirjol jelisindegi ótkizý qabileti shekteýli ýchaskelerdi («tar tustardy») joıý máselelerin talqylady.
Jobanyń áleýmettik bóliginde personaldy qorǵaý sharalary men «Otbasy bank» AQ-pen birlesip arnaıy turǵyn úı baǵdarlamalaryn iske qosý qarastyrylǵan. Usynylǵan usynystar barlyq múddeli tarappen pysyqtalǵannan keıin Ulttyq jobany sońǵy nusqada bekitýge negiz bolady.
Buǵan deıin Energetıka mınıstrligi janyndaǵy Qoǵamdyq keńes 2026 jylǵa arnalǵan jumys josparyn bekitkenin jazǵanbyz.