2030 jylǵa deıingi Inklıýzıvti saıasat tujyrymdamasy ázirlendi — Asqarbek Ertaev

ASTANA. KAZINFORM — 2030 jylǵa deıingi Inklıýzıvti saıasat tujyrymdamasy ázirlendi. Bul týraly QR Eńbek jáne halyqty áleýmettik qorǵaý vıtse-mınıstri Asqarbek Ertaev málim etti.

«Memleket basshysynyń tapsyrmasyn júzege asyrý maqsatynda 2030 jylǵa deıingi Inklıýzıvti saıasat tujyrymdamasy ázirlendi. Múgedektiktiń medıtsınalyq-áleýmettik modelinen áleýmettik-quqyqtyq qorǵaý modeline kóshýge jaǵdaı jasaý túbegeıli jańashyldyq bolyp tabylady. Inklıýzıvti saıasatty júzege asyrýdyń jańa tásilderi múgedektigi bar adamdardyń quqyqtaryn iske asyrýǵa, múmkindikterin keńeıtýge, olardyń qoǵamǵa tolyqqandy áleýmettik yqpaldasýy úshin qajetti jaǵdaılar jasaýǵa baqyttalǵan pármendi sharalar keshenin qabyldaýdy kózdeıdi», — dedi vıtse-mınıstr OKQ alańynda ótken baspasóz máslıhatynda.

Vedomstvo ókiliniń aıtýynsha, tujyrymdama jobasy 13 baǵytty qarastyrady, onyń ishinde mynandaı negizgi baǵyttardy atap ótýge bolady:

1. Teńdik jáne kemsitpeý;
2. Quqyqtyq qorǵaý jáne sot tóreligine qol jetkizý;
3. Ómir súrý deńgeıi jáne áleýmettik qorǵaý;
4. Inklıýzıvti eńbek naryǵy jáne óndiristik orta;
5. Inklıýzıvti bilim berý;
6. Qoljetimdi kórsetiletin qyzmet jáne kedergisiz orta qurý.

Buǵan deıin qazirgi tańda elimizde 732 myńnan astam múgedektigi bar adam turatyny aıtyldy. Osy oraıda múgedektik boıynsha áleýmettik járdemaqylar tólemine 2024 jyly memlekettik bıýdjetten 624,1 mlrd teńge bólingen.

Eske sala keteıik, elimizde 732 myńnan astam múgedektigi bar adam turady.