2030 jylǵa deıingi 1500 shaqyrym jol tórt jáne odan da kóp jolaqty bolady – Kólik mınıstrligi
ASTANA. KAZINFORM – QR Kólik mınıstrligi respýblıkalyq joldarda qaýipsizdikti qamtamsyz etý jumystary qalaı júrzege asyrylp jatqanyǵy týraly málimetterdi jarııalady.
Mınıstrlik málimetterine qaraǵanda, respýblıkalyq mańyzy bar avtomobıl joldarynda jol qozǵalysy qaýipsizdigin arttyrýǵa baǵyttalǵan aýqymdy ári júıeli sharalar júzege asyrylyp keledi. Atalǵan jumystar jol-kólik oqıǵalarynyń sanyn azaıtýǵa, qaıǵyly jaǵdaılardyń aldyn alýǵa jáne azamattardyń ómirin saqtaýǵa baǵyttalǵan. Bul tásilder zamanaýı tsıfrlyq sheshimderdi, ınjenerlik qaýipsizdik sharalaryn jáne jol ınfraqurylymyn keshendi damytýdy úılestiredi.
- Jol-kólik oqıǵalarynyń aldyn alýdyń tıimdi quraldarynyń biri respýblıkalyq mańyzy bar joldardyń aqyly ýchaskelerinde ortasha jyldamdyqty retteýdi engizý bolyp tabylady. Búgingi tańda bul júıe jalpy uzyndyǵy 2 myń shaqyrymdy quraıtyn 8 ýchaskede jumys isteıdi. Alǵashqy nátıjeler onyń tıimdiligin kórsetip otyr. Engizilgen ýchaskelerde jol-kólik oqıǵalarynyń sany 15 paıyzǵa azaıdy, bul júrgizý mádenıetiniń jaqsaryp kele jatqanyn kórsetedi,-delinge habarlamada.
Memleket basshysynyń respýblıkalyq mańyzy bar 10 myń shaqyrym avtomobıl joldaryna aýqymdy orta merzimdi jóndeý jumystaryn júrgizý týraly tapsyrmasyn júzege asyrý aıasynda jol tósemderin jańartý ǵana emes, qozǵalys qaýipsizdigin arttyrý boıynsha keshendi sharalar qolǵa alynǵan. Jóndelip jatqan ýchaskeler boıyna zamanaýı jaryqtandyrý ornatylyp, qaýipsiz jaıaý júrginshiler ótkelderi salynyp, jańa jol belgileri men basqa da ınfraqurylym elementteri qoıylyp jatyr.
Qozǵalysty basqarýdyń ıntellektýaldyq júıelerine de erekshe nazar aýdarylǵan. Astana–Şýchınsk jáne Astana–Temirtaý baǵyttarynda aýa raıyna, kóriný deńgeıine jáne qozǵalys jaǵdaıyna qaraı ruqsat etilgen jyldamdyqty 140 km/saǵattan 60 km/saǵatqa deıin tómendetýge múmkindik beretin 72 aýyspaly aqparattyq belgi ornatyldy. Bolashaqta mundaı tájirıbe basqa baǵyttarǵa da engiziletin bolady.
Sonymen qatar, 2030 jylǵa deıingi uzaq merzimdi perspektıvada shamamen 1500 shaqyrym joldy tórt jáne odan da kóp jolaqty etip keńeıtý josparlanyp otyr. Jumystar onyń ishinde Aqtóbe–Qyzylorda, Atyraý–Dossor baǵyttarynda, sondaı-aq Saryaǵash pen Rýdnyı qalalarynyń aınalma joldarynda júrgiziletin bolady.
-Joldyń ótkizý qabiletin arttyrý jalpy qaýipsizdik deńgeıin jaqsartýǵa múmkindik beredi,-delingen habarlamada.
Osyǵan deıin 2026 jyly elde 11 myń shaqyrym jol jóndelip, salynatyny týraly jazdyq.