2030 jylǵa deıin sýmen jabdyqtaý salasynda derekter 100 paıyz onlaın beriledi

ASTANA. KAZINFORM – «Smart Turmys» turǵyn úı-kommýnaldyq sharýashylyǵynyń biryńǵaı tsıfrlyq platformasy ázirlenip jatyr. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Madıev aıtty.

– «Smart Turmys» turǵyn úı-kommýnaldyq sharýashylyǵynyń biryńǵaı tsıfrlyq platformasy qalyptastyrylýda. Ol kommýnaldyq qyzmetter boıynsha azamattarǵa arnalǵan biryńǵaı ınterfeıske aınalady. Sonymen qatar, halyqqa qolaıly bolý jáne esep aıyrysýdyń ashyqtyǵyn arttyrý úshin biryńǵaı tólem qujatynyń modeli pysyqtaldy. Basty mindet – obektilerdi esepteý quraldarymen jáne derekterdi onlaın berý arqyly avtomattandyrylǵan júıelermen jaraqtandyrý, - dedi vıtse-premer.

Jaslan Madıevtiń aıtýynsha, bul óndiristen tutynýǵa deıingi, onyń ishinde áleýmettik nysandardy qosa alǵanda, barlyq kezeńdi baqylaýdy qamtamasyz etedi. 2030 jylǵa deıin sýmen jabdyqtaý salasynda derekterdi onlaın berýdi 100 paıyz paıyz qamtamasyz etý qajet. 

– Atalǵan salany tsıfrlandyrýǵa Astana Hub ekojúıesiniń startaptary eleýli úles qosýda. Qazir ekojúıede aqyldy eseptegishter, aǵyp ketý datchıkteri jáne sýdy avtomattandyrý júıeleri sııaqty sý sektorynyń tsıfrlyq sheshimderin jasaıtyn 11 joba bar. Osy startaptardyń jıyntyq tabysy 6,3 mlrd teńgeni quraıdy. Bul ınnovatsııalardyń el ekonomıkasynyń bir bóligine aınalǵanyn kórsetedi, - dedi ol.

Buǵan deıin elimizdegi 90 qala men 7,5 mıllıon turǵyny bar 6 087 aýyl aýyz sýmen 100 paıyz tolyq qamtamasyz etilgenin jazǵan edik.