2030 jylǵa deıin óńdeý ónerkásibinde 478 joba iske qosylady – Ersaıyn Naǵaspaev
ASTANA. KAZINFORM – Qazaqstanda 2023 jyldan beri óńdeý ónerkásibin damytýǵa baǵyttalǵan 623 joba iske qosylyp, jańa ónim túrlerin shyǵarý jolǵa qoıyldy. Bul týraly Úkimet otyrysynda Ónerkásip jáne qurylys mınıstri Ersaıyn Naǵaspaev málim etti.
Onyń aıtýynsha, iske qosylǵan óndiristerdiń qatarynda lokomotıv bólshekteri, avtokólik komponentteri, turmystyq tehnıka, qubyrlar, qurylys materıaldary jáne ózge de ónim túrleri bar.
– Jańa óndiristerdi damytý maqsatynda 2023 jyldan beri óńdeý ónerkásibin damytýǵa baǵyttalǵan 623 joba iske qosyldy. Nátıjesinde elimizde buryn óndirilmegen jańa ónim túrleri shyǵaryla bastady. Atap aıtqanda, lokomotıvterdiń tirek balqalary, avtobýstardyń qaptama elementteri, júk tehnıkasyna arnalǵan bólshekter, avtokólik oryndyqtary men mýltımedııalyq júıeler, turmystyq tehnıka, túzý qubyrlar, tereze profılderi, fıbrotsement taqtalary, lamınat, jylytý radıatorlary jáne ózge de jańa ónim túrleri óndirile bastady, – dedi Ersaıyn Naǵaspaev.
Sonymen qatar 2030 jylǵa deıin taǵy 478 jobany iske qosý josparlanǵan. Jańa óndirister aıasynda jańartylatyn energııa kózderine arnalǵan jabdyqtar, hımııa ónerkásibi jáne qurylys salasyna qajetti ónimder shyǵarý kózdelip otyr.
– Osy jobalar aıasynda jańartylatyn energııa kózderine arnalǵan transformatorlar, bandajdar, prester, sýtegi peroksıdi, jelatın men pepton, sondaı-aq asfalt-betonǵa arnalǵan qospalar sııaqty jańa ónim túrleriniń óndirisi ıgeriletin bolady, – dep tolyqtyrdy mınıstr.
Aıta keteıik, elimizde óńdeý ónerkásibiniń ósimi 9,8%-dy qurady.
