2030 jylǵa deıin keminde 200 nysanǵa rekonstrýktsııa jasalady

ASTANA. KAZINFORM — Bul týraly Prezıdent energetıka salasy qyzmetkerlerin kásibı merekesimen quttyqtaǵan saltanatty jıynda aıtty. Osy oraıda Qasym-Jomart Toqaev ınfraqurylymdy qalypty deńgeıde ustap turý úshin «Tarıfti ınvestıtsııaǵa aıyrbastaý» baǵdarlamasy iske qosylǵanyn eske saldy. 

– Sonyń nátıjesinde úsh jyl ishinde tek kásiporyndardyń kúrdeli jóndeý jumystaryna 900 mıllıard teńgeden astam jeke ınvestıtsııa tartyldy. Bul jumystyń qarqynyn báseńdetpeý kerek. Aldymyzda senimdi ári zamanaýı energetıka ınfraqurylymyn qalyptastyryp, ekonomıkanyń damýyna tıisti jaǵdaı jasaý mindeti tur. Osy oraıda Úkimet «Energetıkalyq jáne kommýnaldyq sektorlardy jańǵyrtý» jónindegi ulttyq jobany iske asyra bastady. Onyń aıasynda 2030 jylǵa deıin keminde 200 nysanǵa rekonstrýktsııa jasalady, 86 myń shaqyrym jeli jańarady. Úkimetke elimizdiń energetıkalyq áleýetin udaıy arttyrý mindeti júkteldi. Bul – Qazaqstannyń ekonomıkalyq damýyn odan ári tabysty júzege asyrý úshin asa mańyzdy. Elimiz eksporttyq áleýeti zor energetıkalyq derjavaǵa aınalýy kerek, – dedi Memleket basshysy. 

Aıta keteıik, Prezıdent mańyzdy mindetterdi júzege asyrý úshin energetıka salasyn túbegeıli jańǵyrtý kerek ekenin aıtty.