2030 jylǵa deıin 42 sý qoımasy salynyp, sý jınaý kólemi 2,6 mlrd tekshe metrge artady
ASTANA. KAZINFORM – Qazaqstanda sý tutyný kóleminiń ósýi aıasynda sý sharýashylyǵy ınfraqurylymyn damytý boıynsha aýqymdy jobalar júzege asyrylyp jatyr. Bul týraly Sý resýrstary jáne ırrıgatsııa mınıstrligi málim etti.
Vedomstvonyń dereginshe, elimizde jyl saıyn shamamen 25 mlrd tekshe metr sý tutynylady. Onyń 65%-y aýyl sharýashylyǵyna, 25%-y ónerkásip salasyna tıesili.
Mınıstrlik klımattyń ózgerýi men sý resýrstarynyń azaıýy jaǵdaıynda sýdy tıimdi paıdalaný memlekettik saıasattyń basym baǵytyna aınalǵanyn atap ótti.
- Osy maqsatta sý sharýashylyǵy ınfraqurylymyn jańǵyrtý jáne salý jumystary júrgizilýde. 2026 jyldyń basynan beri shamamen 700 shaqyrym kanal mehanıkalyq ádispen tazartylǵan. Al sońǵy 2,5 jylda 3,5 myń shaqyrymnan astam kanal tazalanǵan.
Budan bólek, 1200 shaqyrym kanalǵa rekonstrýktsııa jumystary bastaldy. Ońtústik óńirlerde 65 myń gektar jerdi sýaratyn 103 kanal avtomattandyrylyp jatyr. Sondaı-aq únemdelgen qarajat esebinen uzyndyǵy 85,5 shaqyrym bolatyn 14 kanal betonmen qaptalýda, - delingen aqparatta.
Halyqaralyq qarjy ınstıtýttarymen birlesken jobalar da iske asyrylýda. Eýropalyq qaıta qurý jáne damý bankimen birlesken 46 joba aıaqtalyp, 502 shaqyrym kanal jańǵyrtyldy. Islam damý bankiniń qoldaýymen júzege asyrylyp jatqan 9 joba aıasynda josparlanǵan 635 shaqyrymnyń shamamen 600 shaqyrymy rekonstrýktsııadan ótti.
- Sonymen qatar Batys Qazaqstan, Jambyl jáne Qyzylorda oblystarynda úsh sý qoımasynyń qurylysy bastaldy. Túrkistan oblysynda jalpy kólemi 69 mln tekshe metr bolatyn eki sý qoımasy salynyp jatyr.
Qoldanystaǵy sý qoımalaryn jańǵyrtý boıynsha 7 joba ázirlenip, taǵy 7 oblystaǵy 11 nysanǵa qatysty jobalaý jumystary jalǵasýda. Buǵan qosa Túrkistan oblysyndaǵy Qapshaǵaı, Batys Qazaqstan oblysyndaǵy Kırov, Abaı oblysyndaǵy Shar, Jetisý oblysyndaǵy Qyzylaǵash sý qoımalary jáne Qostanaı oblysyndaǵy «Albarbóget» bógeti rekonstrýktsııalandy, - dep jazdy mınıstrlikten.
Túrkistan oblysyndaǵy Kóksaraı kontrrettegishin jáne Jambyl oblysyndaǵy «Qaraqońyz» sý qoımasyn jańǵyrtý, sondaı-aq syıymdylyǵy 870 mln tekshe metr bolatyn Esil kontrrettegishin salý boıynsha rásimder bastaldy.
Sý resýrstaryn basqarý júıesin damytý tujyrymdamasyna sáıkes, 2030 jyldyń sońyna deıin Qazaqstanda 42 jańa sý qoımasyn salý jáne 37 qoldanystaǵy nysandy rekonstrýktsııalaý josparlanǵan. Bul sharalar aýyl sharýashylyǵyn turaqty sýmen qamtamasyz etýge, sý tasqyny qaýpin azaıtýǵa jáne transshekaralyq sýǵa táýeldilikti tómendetýge múmkindik beredi.
Sonymen qatar iske asyrylatyn jobalar jyl saıyn qosymsha 2,6 mlrd tekshe metrge deıin sý jınaýǵa jaǵdaı jasaıdy.
Aıta keteıik, buǵan deıin memleket bógetter men sý qoımalarynyń qaýipsizdigin qalaı baqylaıtyny habarlandy.
