2030 jylǵa arnalǵan Ekonomıkalyq yntymaqtastyq uıymynyń týrıstik astanasy retinde Aqtaý usynyldy
ASTANA. KAZINFORM – Týrızm jáne sport mınıstri Erbol Myrzabosynov elordada Ekonomıkalyq yntymaqtastyq uıymynyń Bas hatshysy Asad Madjıd Hanmen kezdesti. Bul týraly Týrızm jáne sport mınıstrliginiń baspasóz qyzmeti habarlady.
Kezdesý barysynda taraptar týrızm jáne sport salalaryndaǵy óńirlik yntymaqtastyqty damytý, ınvestıtsııalyq baılanystardy keńeıtý jáne birlesken bastamalardy iske asyrý máselelerin talqylady.
Mınıstr Qazaqstannyń Uıymǵa múshe memlekettermen kópjaqty ózara is-qımyldy damytýǵa erekshe mán beretinin atap ótti.
– Sizdiń elimizge alǵashqy saparyńyz aldaǵy yntymaqtastyqty nyǵaıtý jolyndaǵy mańyzdy qadam bolady dep senemin. Týrızm men sport – turaqty ekonomıkalyq ósýdiń, mádenıetaralyq dıalogtyń jáne óńirlik ıntegratsııanyń mańyzdy qozǵaýshy kúshteri, - dedi Erbol Myrzabosynov.
Kezdesý barysynda týrızm salasyndaǵy birlesken bastamalarǵa erekshe nazar aýdaryldy. Atap aıtqanda, 2025 jylǵy qyrkúıekte Aqtaý qalasynda ótken halyqaralyq týrıstik forýmnyń mańyzy atap ótildi. Forým aıasynda Uıym keńistigindegi ınvestıtsııalyq yntymaqtastyqqa arnalǵan sessııa uıymdastyrylyp, memleket, bıznes jáne halyqaralyq seriktester arasynda tıimdi dıalog ornady.
2026 jylǵy 27-29 sáýir kúnderi Ázerbaıjannyń Shýsha qalasynda Ekonomıkalyq yntymaqtastyq uıymy Týrızm mınıstrleriniń otyrysy ótedi. Qazaqstan Aqtaý qalasyn 2030 jylǵa arnalǵan Uıymnyń týrıstik astanasy mártebesine usyndy. Aqtaý – Kaspıı teńiziniń jaǵalaýynda ornalasqan biregeı qala. Sondyqtan munda jaǵajaı, ekologııalyq jáne iskerlik týrızmdi damytýǵa zor múmkindik bar.
Eske salsaq, buǵan deıin Qazaqstan týrızminiń úshtaǵany Almaty, Mańǵystaý, Býrabaı týraly jazǵan edik.
