2029 jylǵa qaraı sý resýrstary salasyndaǵy mamandar tapshylyǵy artady

ASTANA. QazAqparat – 2029 jylǵa qaraı elimizdiń sý resýrstary salasyndaǵy maman tapshylyǵy 800 adamǵa jetedi. Bul týraly Sý resýrstaryn basqarý júıesin damytýdyń 2023-2029 jyldarǵa arnalǵan tujyrymdamasynda aıtylǵan.

«Jańa tehnologııalardy engizý aıasynda sý salasyndaǵy mamandyqtar úshin bilim berý standarttaryn qaıta qaraý qajet.

Boljam boıynsha, 2029 jylǵa qaraı joǵary bilikti mamandarǵa degen qajettilik 800 adamǵa deıin artady. Bul rette olardy oqytý úshin 350-ge deıin professorlyq-oqytýshylyq quram, onyń ishinde 170-i ǵylymı dárejesi bar adam qajet bolady», - delingen qujatta.

Tujyrymdama avtorlary salaǵa jastardyń kelmeýine túrtki bolyp otyrǵan faktorlardy da ataǵan.

«Jalaqynyń tómen deńgeıine, jumysqa ornalasýdyń kúrdeliligine, sharýashylyq júrgizýshi sýbektilerdiń jas mamandardy jumysqa qabyldaýǵa qulyqsyzdyǵyna baılanysty sý sharýashylyǵy uıymdary qyzmetkerleriniń basym bóligin zeınetkerlik jasqa deıingi adamdar quraıdy. Urpaqtar sabaqtastyǵy qaǵıdatyn buzýdyń qaýipti tendentsııasy baıqalyp otyr. Óıtkeni joǵary bilikti maman daıarlaý jáne qalyptastyrý úshin keminde 10-15 jyl qajet», - dep jazylǵan tujyrymdamada.