2029 jyly Jetisý halqynyń 91,9% tabıǵı gazǵa qol jetkizedi – ákim

ASTANA. KAZINFORM – Jetisý oblysynyń ákimi Beıbit Isabaev óńir halqyn turǵyn úımen jáne gazben qamtý baǵytyndaǵy jumystar boıynsha esep berdi.

- Bıyl turǵyn úı qurylysyna 7,6 mlrd teńge bólindi (56 kópqabatty jáne 214 jeke turǵyn úı). Budan bólek, halyqtyń áleýmettik osal toptary úshin 866 páter satyp alyndy, oǵan 15,9 mlrd teńge kózdelgen. Apatty turǵyn úı máselelerin sheshýge erekshe nazarda. Byltyr oblysta 348 páter apatty dep tanylyp, ótken jyly 1,3 mlrd teńgege 137 páter satyp alyndy, - dedi Beıbit Isabaev óńirdiń áleýmettik-ekonomıkalyq damýy týraly esep bere turyp. 

Ákimniń esebinshe, bıyl jergilikti bıýdjetten 2,4 mlrd teńgege 155 jańa páter alyndy. 

- Sondaı-aq, «Samuryq-Qazyna AQ demeýshileriniń esebinen 560 páterlik kópqabatty turǵyn úı salynyp jatyr. Jalpy bıyl 2 708 páter salyndy jáne satyp alyndy, - dep tolyqtyrdy óńir basshysy. 

Odan ári B. Isabaev óńirdi gazben qamtý jumystaryna toqtaldy. 

- Gazben qamtýǵa jatatyn 192 eldi mekenniń 63-i gaz jetti. Kelesi jyly 21 nysannyń qurylysy jalǵasyp, taǵy 42 nysannyń qurylysy bastalady. 2025 jyldyń sońyna qaraı Kerbulaq aýdanynan Taldyqorǵanǵa deıingi 126 eldi meken gazdandyrylady. Sondaı-aq bıyl 19 tamyzda «Taldyqorǵan-Úsharal» magıstraldy gaz qubyrynyń qurylysy bastaldy. Joba kelesi jyly aıaqtalady dep kútilýde. Sonymen qatar Aqsý, Sarqan, Alakól aýdandarynyń 66 eldi mekenine gaz jelilerin tartý jobasy ázirlenip jatyr, - deıdi ol. 

Jetisý oblysy ákiminiń málimdeýinshe, 2029 jylǵa qaraı óńir halqynyń 91,9% tabıǵı gazǵa qol jetkizedi. 

Buǵan deıin Jetisý oblysynda 2,6 trln teńgege 189 ınvestıtsııalyq joba qolǵa alynǵany aıtyldy.