2029 jyly qýaty 1,25 mln tonna bolatyn polıetılen zaýyty iske qosylady

ASTANA. KAZINFORM – 4 jyldan soń elimizde jyldyq qýaty 1,25 mln tonna bolatyn polıetılen zaýyty iske qosylady. Bul týraly QR EM Munaı-gaz-hımııa jáne tehnıkalyq retteý departamentiniń dırektory Temirlan Úrkimbaev aıtty.

— 2022 jyldyń qarasha aıynda jylyna 500 myń tonna ónim óndirýge qýaty jetetin «Kazakhstan Petrochemical industries inc.» polıpropılen zaýyty iske qosyldy. 2024 jyldyń qorytyndysy boıynsha zaýyt shamamen 250 myń tonna ónim óndirdi. Búgingi tańda zaýyt qapshyqtar, tutynýshylyq qaptamalar, kilem buıymdary, bir rettik ydys-aıaq jáne basqa da ónimderge arnalǵan 12 markadaǵy polıpropılen shyǵarady, - dedi ol Power Central Asia + China óńirlik energetıkalyq forýmynda.

Sondaı-aq departament basshysy 2029 jyly jyldyq qýaty 1,25 mln tonna bolatyn polıetılen óndiretin zaýyt iske qosylatynyn aıtty.

— Qazirgi tańda bolashaq zaýyt alańyn daıyndaýǵa qatysty bastapqy qurylys jumystarynyń 49,2%-y oryndaldy jáne pırolız qondyrǵylaryn ornatýǵa arnalǵan shuńqyr qazý jumystary bastaldy. Joba aıasynda 20-dan astam suranysqa ıe polıetılen markalaryn (HDPE - joǵary tyǵyzdyqtaǵy polıetılen jáne tómen tyǵyzdyqtaǵy polıetılen – LLDPE) shyǵarý josparlanyp otyr, onyń 40%-y premıým-klassqa jatady, - dedi Temirlan Úrkimbaev.

Spıkerdiń aıtýynsha, bul jobany iske asyrýǵa SIBÝR, Sinopec sııaqty álemdik kompanııalar atsalysady. Sondaı-aq eń iri halyqaralyq EPC merdigerleri, atap aıtqanda Tecnimont, Technicas Reunidas, Hyundai Engineering, Sinopec Engineering jáne basqalary qatysyp jatyr. Bul kompanııalardyń qatysýy jobanyń jahandyq ınjenerlik jáne ekologııalyq standarttarǵa sáıkestigin qamtamasyz etpek.

Aıta keteıik, 2029 jylǵa deıin 1,6 myń km jylý berý jelisi jańǵyrtylady.