2029 jyly ınjenerlik ınfraqurylymnyń jaı-kúıi normatıvtik jumys deńgeıine jetkiziledi
ASTANA. KAZINFORM — 2029 jylǵa qaraı ınjenerlik ınfraqurylymnyń jaı-kúıi normatıvtik jumys deńgeıine jetkiziledi. Bul týraly Tabıǵı monopolııalardy retteý komıtetiniń tóraǵasy Tımýr Qosymbaev aıtty.
— Kommýnaldyq qyzmetter salasyndaǵy tarıftik saıasat máseleleri teńdestirilgen jáne júıeli tásildi talap etedi. Sheshimder qabyldaý kezinde retteýshi tutynýshylar men tabıǵı monopolııalar sýbektileri múddeleriniń teńgerimin saqtaıdy. Atalǵan máselelerdi talqylaý ashyqtyq, negizdilik jáne pándik taldaý negizinde júzege asyrylady. Eń aldymen, eldiń kommýnaldyq ınfraqurylymy kóptegen jyl boıy joǵary tozý jaǵdaıynda bolǵanyn aıtý kerek. Júıeli ınvestıtsııasyz bul sózsiz apattyń ósýine, qyzmet sapasynyń nasharlaýyna, jylý, sý jáne elektr qýatynyń úzilýine ákeledi, — dedi ol turǵyn úı-kommýnaldyq sharýashylyǵy salasynda tarıf qalyptastyrý máselesine arnalǵan dóńgelek ústel barysynda.
Onyń málimetinshe, 2023 jyldan bastap turǵyn úı-kommýnaldyq sharýashylyǵy ınjenerlik ınfraqurylymyn jańǵyrtý boıynsha aýqymdy jumys bastaldy. Osy ýaqyt ishinde 19 myń shaqyrymnan astam ınjenerlik jeliler jóndeldi, ıaǵnı jumys kólemi 2022 jylmen salystyrǵanda eki esege ósti.
— Bul jyl saıyn tozýdyń orta eseppen 3 paıyzǵa tómendeýin qamtamasyz etýge múmkindik berdi. Tabıǵı monopolııa sýbektileri qyzmetkerleriniń jalaqysy 50-100 paıyzǵa ósti. 2029 jylǵa qaraı ınjenerlik ınfraqurylymnyń jaı-kúıin normatıvtik jumys deńgeıine deıin jetkizý josparlanyp otyr, — dedi Tımýr Qosymbaev.
Tabıǵı monopolııalardy retteý komıtetiniń baspasóz qyzmetiniń aqparatyna sáıkes, qazir retteletin kommýnaldyq qyzmetterge tarıfterdi kóterýge moratorıı qoldanylady. Bul rette retteletin kommýnaldyq qyzmetterge mynalar jatady: elektrmen jabdyqtaý, jylýmen jabdyqtaý, sýmen jabdyqtaý jáne sý burý.
