2029 jyly elimizde bir jumyskerdiń ortasha jalaqysy qansha teńge bolady – Úkimet boljamy

ASTANA. KAZINFORM – Úkimet Qazaqstan Respýblıkasynyń 2025–2029 jyldarǵa arnalǵan áleýmettik-ekonomıkalyq damý boljamyn jarııa etti.

Qujatqa sáıkes, aldaǵy 5 jyldyń ishinde bir jumyskerdiń ortasha aılyq jalaqysy tómendegideı ózgermek:

2024 jyly 396 097 teńge;

2025 jyly 431 691 teńge;

2026 jyly 466 957 teńge;

2027 jyly 500 754 teńge;

2028 jyly 536 347 teńge;

2029 jyly 573 736 teńge.

Bul rette, aldaǵy 5 jylda eń tómengi jalaqy mólsheri 85 myń teńge bolyp qala beredi. Alaıda, aılyq eseptik kórsetkish jyl saıyn ózgerip otyrady. Máselen, bıyl 1 AEK 3 692 teńge bolsa, kelesi jyly 3 932 teńgege jetedi. Odan keıin 2026 jyly – 4 148 teńge, 2027 jyly – 4 355 teńge, 2028 jyly – 4 573 teńge, al 2029 jyly 4 802 teńge bolady.

Aıta keterligi, 2023 jyly halyqtyń ortasha jan basyna shaqqandaǵy aqshalaı tabysy 181,9 myń teńgeni qurady jáne nomınaldy mánde – 15,8 paıyzǵa, naqty mánde 1,1 paıyzǵa ósti. Ortasha aılyq jalaqy 364,3 myń teńge boldy. Nomınaldy mánde – 17,6 paıyzǵa, naqty mánde 2,7 paıyzǵa artty.