2029 jylǵa qaraı kommýnaldyq tarıfter qalaı ózgeredi
ASTANA. KAZINFORM — Qazaqstanda 2026–2029 jyldar aralyǵynda kommýnaldyq qyzmet tarıfteri kezeń-kezeńimen ósedi. Bul týraly QR Ulttyq ekonomıka mınıstrligi Tabıǵı monopolııalardy retteý komıtetiniń tóraǵasy Tımýr Qosymbaev málim etti.
Onyń aıtýynsha, tarıfterdiń ózgerýi operatsıondyq shyǵyndardy ınflıatsııa deńgeıine ındeksteý jáne strategııalyq taýarlar baǵasynyń ózgerýimen baılanysty.
— Negizgi qaǵıda — bir mezette iri kólemdegi qarajatty tartyp, ony uzaq merzim ishinde óteý. Sondyqtan tarıfter birden emes, kezeń-kezeńimen ósedi, — dedi Tımýr Qosymbaev.
Komıtet málimetinshe, iri ınfraqurylymdyq jóndeý jumystarynyń quny shamamen 5 mlrd teńge bolǵan jaǵdaıda, tarıfke sol jyly tek 500 mln teńge kólemi ǵana engiziledi. Bul tarıfterdiń kúrt ósýin boldyrmaýǵa múmkindik beredi.
Spıkerdiń aıtýynsha, Sý jáne sýmen jabdyqtaý qyzmetteri boıynsha ortasha ósim 20% deńgeıinde kútiledi. Bul qyzmet túrleri halyqaralyq deńgeıde salystyrmaly túrde tómen baǵalanǵan.
— Keıbir esepteýler boıynsha kommýnaldyq tólem qurylymynda sý qyzmetteriniń úlesi shamamen 1200 teńge deńgeıinde qalyp otyr, — dedi Tımýr Qosymbaev.
Komıtet tóraǵasynyń, 2029 jyldyń sońyna qaraı sýmen jabdyqtaý tarıfteri shamamen eki esege deıin ósýi múmkin.
Sonymen qatar, áleýmettik osal toptar úshin turǵyn úı kómegi tetigi saqtalady. Bul kommýnaldyq shyǵyndardyń belgilengen shekti deńgeıden asatyn bóligin óteý mehanızmi.
Buǵan deıin tabıǵı monopolııa sýbektilerine 900 mln teńgege jýyq aıyppul salynǵanyn jazǵanbyz.
