2029 jylǵa qaraı Qytaıdyń azamattyq tikushaqtar parki 1700-den asady
ASTANA. KAZINFORM — 2029 jylǵa qaraı Qytaıdyń azamattyq tikushaqtar parki 1700 birlikten asady. Bul týraly Qytaıdyń Avıatsııalyq ónerkásip korporatsııasyna (AVIC) qarasty Azamattyq avıatsııa júıelerin zertteý ortalyǵy sársenbi kúni jarııalaǵan jyl saıynǵy esepte aıtyldy, dep jazdy Sınhýa agenttigi.
Qytaıdyń azamattyq tikushaq naryǵynyń damý boljamyna arnalǵan esep Soltústik Qytaıdaǵy Tıantszın qalasynda ótken «Qytaı tikushaq ındýstrııasy-2025» damý forýmynda tanystyryldy.
Qujatta Qytaıdyń áleýmettik-ekonomıkalyq damýy men azamattyq tikushaqtardy negizgi qoldaný salalaryna jan-jaqty taldaý jasala otyryp, aldaǵy 10 jylǵa arnalǵan naryqtyq boljam usynylǵan. Soǵan sáıkes, 2034 jylǵa qaraı Qytaıdaǵy azamattyq tikushaqtar sany 2000 birlikten asady.
Esepte 2030 jyldan keıin Qytaıdyń azamattyq tikushaqtar parkiniń ósý qarqyny baıaýlaıtyny aıtylǵan. Buǵan shaǵyn bıiktikte ushý tehnologııalarynyń, atap aıtqanda drondar men tik ushyp-qona alatyn elektrli áýe kólikteriniń (eVTOL) básekelestigi sebep bolady.
Sonymen qatar, esepte Qytaı ekonomıkasynyń qurylymy ońtaılandyrylyp jatqan tusta jáne shaǵyn bıiktik avıatsııasynyń damýyna baılanysty azamattyq tikushaqtardyń ushý saǵattary turaqty ósip jatqany kórsetilgen. Boljam boıynsha, 2029 jyly bul kórsetkish 300 myń saǵattan, al 2034 jyly 370 myń saǵattan asady.
2024 jyldyń sońyna qaraı Qytaıdaǵy azamattyq tikushaqtar sany 1403 birlikke jetti, bul jyldyq eseppen 2,3%-ǵa óskenin kórsetedi. Jeńil tikushaqtar Qytaıdaǵy azamattyq tikushaqtar parkiniń negizgi bóligin qurap otyr, olardyń úlesi 40%-dan asady.
Aıta keteıik, buǵan deıin Qytaılyq kompanııa avtonomdy ushatyn taksıdi iske qosqanyn jazǵan edik.