2029 jylǵa qaraı qazaqstandyqtardyń 50 paıyzy sportpen turaqty aınalysady – mınıstr maqsaty

ASTANA. KAZINFORM – Ótken jyldyń qorytyndysy boıynsha qazaqstandyqtardyń 41,4 paıyzy sportpen turaqty aınalysady. Bul málimetti Týrızm jáne sport mınıstri Erbol Myrzabosynov rastap otyr.

- «Taza Qazaqstan» baǵdarlamasynda salaýatty ómir saltyn qalyptastyrý da mańyzdy ról atqarady. Mınıstrlik halyqty dene shynyqtyrý men sportqa tartý úshin keshendi sharany atqaryp jatyr. Ótken jyly sportpen turaqty túrde aınalysatyndar úlesi 41,4%-ǵa jetti, bul degenimiz 8,4 mıllıonnan astam adam. Bizdiń maqsat – 2029 jylǵa qaraı atalǵan kórsetkishti 50%-ǵa jetkizý. Jyl saıyn elimizde 25 myńnan astam sporttyq-buqaralyq is-shara ótedi. Onyń ishinde marafondar, velojarystar, otbasylyq festıvalder, jappaı syrǵanaý syndy sporttyq is-sharalar halyq arasynda keńinen taralyp keledi, - dedi Erbol Myrzabosynov Úkimet otyrysynda.

Osy oraıda mınıstr buqaralyq sport jolǵa qoıylǵan qala retinde elordany úlgi etti.

- Bıyl alǵashqy toqsanda Astanada 240-tan astam buqaralyq sport sharasy ótti. Oǵan 29 myńnan astam adam qatysty. Qalada dene shynyqtyrýmen aınalysý úshin qolaıly jaǵdaı jasalyp jatyr. Velojoldardyń jalpy uzyndyǵy –77,5 shaqyrym, júgirý joly shamamen 25 shaqyrym. Astanada 2833 sport sektsııasy bar. Qalada barlyq jasqa arnalǵan áleýmettik jobalar men bastamalar iske asyrylyp jatyr, - dep tolyqtyrdy vedomstvo basshysy.

Buǵan deıin el óńirlerinde jańartylyp, salynyp jatqan stadıondar týraly jazǵan edik. 

Eske salsaq, 2024 jyldyń qorytyndysy boıynsha ulttyq sport túrlerimen turaqty túrde aınalysatyn qazaqstandyqtardyń sany 660 myńnan asty.