2029 jylǵa deıin jańartylatyn energııa kózi iri obektisi aıaqtalady
ASTANA. KAZINFORM – Premer-mınıstrdiń orynbasary Qanat Bozymbaev elimizde ınvestıtsııa salýǵa qolaıly jaǵdaı jasaýǵa erekshe mán beriletinin aıtty.
— 2029 jylǵa deıin Total Eren, Masdar, ACWA Power jáne China Power International Holding sııaqty strategııalyq halyqaralyq seriktesterdiń qatysýymen júzege asyrylyp jatqan jańartylatyn energııa kózi iri obektisin aıaqtaý josparlanǵan, — dedi Qanat Bozymbaev elordada ótip jatqan Astana Finance Day — 2025 halyqaralyq forýmynda.
Úkimet basshysy orynbasarynyń málimdeýinshe, atalǵan jobalar elimizge asa qajet.
— Óıtkeni, óńirlerdiń ekonomıkalyq múmkindigin kúsheıtedi, myńdaǵan jańa jumys oryndary ashylady jáne sol arqyly azamattardyń ál-aýqatynyń ósýine yqpal etedi. Sondyqtan biz ınvestıtsııalyq qyzmettiń tabysty júzege asyrylýyna qolaıly jaǵdaı jasaýǵa erekshe mán beremiz, — deıdi ol.
Buǵan deıin Qanat Bozymbaev Transkaspıı dálizi arqyly júk tasymaly 10 mln tonnaǵa deıin ulǵaıtý jospary týraly aıtqan edi.
Búgin elordada Astana Finance Day–2025 ótip jatyr.
Eki kúnge jalǵasatyn Astana Finance Days-te álemniń 70-ten astam elinen 5 000-nan asa qatysýshy, onyń ishinde brokerler, bankırler, ınvestorlar men ınnovatorlardy qosa alǵanda, qarjy jáne tehnologııalyq sektor, sondaı-aq memlekettik jáne kvazımemlekettik sektor ókilderi bas qosyp otyr.