2029 jylǵa deıin otandyq dári-dármek kólemi 50 paıyzǵa jete me – DSM jaýaby

ASTANA. KAZINFORM – QR Densaýlyq saqtaý mınıstri mindetin atqarýshy Ardaq Amangeldiuly otandyq farmatsevtıka salasyndaǵy otandyq ónim kólemin arttyrý úshin qandaı sharalar jasalyp jatqanyn aıtty.

Májilistiń jalpy otyrysynda depýtat Nartaı Aralbaıuly QR Joǵarǵy aýdıtorlyq palatasy júrgizgen aýdıt nátıjelerin tilge tıek ete otyryp, «Memleket basshysy júktegen «2029 jylǵa qaraı dári-dármekter salasynda otandyq ónim kólemin 50 paıyzǵa jetkizý» tapsyrmasyn vedomstvo oryndaı ala ma? Ol úshin naqty qandaı sharalar atqarylyp jatyr?» degen saýal qoıdy.

- Osy másele aıasynda biz byltyrdan beri arnaıy departament quryp, júıeli jumys júrgizip jatyrmyz. Qazir naqty 34 taýar óndirýshi bar. 90 shart negizinde 507 dári-dármek óndiriledi jáne 2 myńdaı medıtsınalyq buıym shyǵarylady. Osy sharttardan basqa 7 joba boıynsha jumys istep jatyrmyz. Ondaǵy jalpy ınvestıtsııa kólemi – 650 mln dollar. Olardy iske qossaq, bizdiń qosymsha óndiriletin ónim 2029 jyly 300 mln dollarǵa ósedi degen josparymyz bar, - dep jaýap berdi Ardaq Amangeldiuly.

Sondaı-aq spıker osy 7 joba sátti júzege assa, otandyq ónim kólemin 14 paıyzdaı arttyratynyn atap ótti.

Aıta keteıik, buǵan deıin otandyq dári-dármek úlesin 50 paıyzǵa jetkizý úshin 7 joba qarastyrylyp jatqanyn jazǵan edik.