2029 jylǵa deıin qýaty 7,3 GVt bolatyn qosymsha generatsııa kózderi iske qosylady
ASTANA. KAZINFORM – Qazaqstanda 2029 jylǵa deıin quny 6,2 trln teńge bolatyn jıyntyq qýaty 7,3 GVt bolatyn qosymsha generatsııa kózderin iske qosý josparlanǵan. Bul týraly Elektr energetıkasyn damytý departamentiniń dırektory Asyljan Mýsın aıtty.
— Energetıka jáne kommýnaldyq sektorlardyń negizgi aktıvteriniń tozýy 50%-dan asady. Bul máseleni sheshý maqsatynda «Energetıka jáne kommýnaldyq sektordy jańǵyrtý» ulttyq jobasy aıasynda generatsııa nysandaryn, jylý jáne elektrmen jabdyqtaý jelilerin jańǵyrtý kózdelgen. 2029 jylǵa deıin elektrmen jabdyqtaý jelileriniń ortasha tozýyn 45%-ǵa, al jylýmen jabdyqtaý jelileriniń tozýyn 42%-ǵa deıin tómendetý josparlanyp otyr, — dedi ol Power Central Asia + China óńirlik energetıkalyq forýmynda.
Sondaı-aq, ol Qazaqstanda 2029 jylǵa deıin jıyntyq qýaty 7,3 GVt bolatyn qosymsha generatsııa kózderin iske qosý josparlanǵanyn aıtty.
— Energııa nysandaryn jańǵyrtý men jańadan salý jumystaryna 2029 jylǵa deıin 6 208 mlrd teńge kóleminde ınvestıtsııa tartý kózdelgen. Atap aıtqanda:
• Qoldanystaǵy aktıvterdi jańǵyrtý boıynsha 1 770 mlrd teńgege 14 joba (2 050 MVt);
• Jańa qýattardy iske qosý boıynsha 4 438 mlrd teńge 15 joba (5 259 MVt) iske asyrylady, — dedi departament basshysy.
Aıta ketý kerek, generatsııa sektory boıynsha jobalar elektr qýaty naryǵynyń qoldanystaǵy mehanızmderi (aýktsıondar, ınvestıtsııalyq kelisimder, tenderler) sheńberinde júzege asyrylady jáne olarǵa bıýdjet qarajaty esebinen sýbsıdııa tartylmaıdy.
— 2029 jylǵa deıin 29 jobany aıaqtaý josparlanyp otyr, bul elektr stantsııalarynyń ortasha tozýyn 17%-ǵa deıin tómendetýge múmkindik beredi. Atalǵan jobalardy iske asyrý ornatylǵan elektr qýatyn arttyrýǵa jáne el ekonomıkasy men halqyn senimdi elektrmen qamtamasyz etýge múmkindik beredi, — dep túıdi sózin Asyljan Mýsın.
Aıta keteıik, buǵan deıin bıyl elimizde 9 jańartylatyn energııa kózi iske qosylatynyn jazǵan edik.