2029 jylǵa deıin Qazaqstanǵa 40 kerqulan jetkiziledi
ASTANA. KAZINFORM — 1 maýsymda Qazaqstanǵa Chehııa Respýblıkasynan kerqulannyń (Prjevalskıı jylqylarynyń) kezekti toby jetkizildi. Bul týraly Ekologııa jáne tabıǵı resýrstar mınıstrliginiń baspasóz qyzmeti habarlady.
Bul — álemde saqtalǵan jalǵyz jabaıy jylqy túriniń popýlıatsııasyn qalpyna keltirýge baǵyttalǵan halyqaralyq joba aıasynda ákelingen janýarlardyń kezekti legi.
— Arnaıy áýe reısimen janýarlar Chehııadan Qostanaı qalasynyń halyqaralyq áýejaıyna jetkizildi. Odan ári olar arnaıy jabdyqtalǵan avtokólikpen Qostanaı oblysy Amangeldi aýdanyndaǵy «Altyn Dala» memlekettik tabıǵı rezervatyna tasymaldanady. Reıntrodýktsııa ortalyǵynda janýarlar mamandardyń baqylaýymen beıimdelý kezeńinen ótip, keıin tabıǵı mekendeý ortasyna jiberýge daıyndalady, — delingen mınıstrlik habarlamasynda.
Tarıhı turǵydan kerqulan Qazaqstan aýmaǵynda mekendegen jáne Qazaqstan dalalarynyń tabıǵı murasynyń bir bóligi. Alaıda XX ǵasyrdyń ortasyna qaraı bul túr jabaıy tabıǵattan joıylyp ketti. Ony qalpyna keltirý halyqaralyq saqtaý jáne reıntrodýktsııa baǵdarlamalarynyń arqasynda múmkin boldy.
Búginde Qazaqstan osy biregeı túrdi óziniń tarıhı mekendeý ortasyna qaıtarý boıynsha aýqymdy baǵdarlamany júzege asyryp jatyr.
Joba Qazaqstan Respýblıkasy Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti, Praga haıýanattar baǵy, «Tırpark Berlın» haıýanattar baǵy, Qazaqstannyń bıoalýantúrlilikti saqtaý qaýymdastyǵy, Frankfýrt zoologııalyq qoǵamy jáne basqa da halyqaralyq seriktestermen birlesip júzege asyrylyp jatyr.
Qazaqstan men Praga haıýanattar baǵy arasyndaǵy yntymaqtastyq týraly memorandýmǵa sáıkes, 2029 jylǵa deıin Qazaqstanǵa 40 kerqulan jetkizý josparlanǵan. 2024 jáne 2025 jyldary «Altyn Dala» rezervatyna janýarlardyń alǵashqy eki toby ákelingen. Al bıylǵy jyldyń mamyr aıynda buryn jetkizilgen janýarlardyń bir bóligi alǵash ret jabaıy tabıǵatqa jiberildi.
Jobanyń negizgi maqsaty — Ortalyq Qazaqstan dalalarynda kertaǵynyń turaqty popýlıatsııasyn qalyptastyrý jáne dala ekojúıelerin qalpyna keltirý.
Jobany iske asyrý Qazaqstan úshin úlken mańyzǵa ıe. Ol bıologııalyq ártúrlilikti saqtaýǵa, tarıhı turǵydan joǵalǵan janýarlar túrlerin qalpyna keltirýge, tabıǵat qorǵaý salasyndaǵy halyqaralyq yntymaqtastyqty nyǵaıtýǵa jáne elimizdiń dala ekojúıeleri men sırek kezdesetin jabaıy janýarlardy qorǵaý isindegi kóshbasshy memleket retindegi bedelin arttyrýǵa yqpal etedi.
Eske salsaq elimizge Eýropadan taǵy segiz Prjevalskıı jylqysy ákelinetini týraly jazǵan edik.
