2029 jylǵa deıin batys óńirlerde 2,5 myńnan astam ınvestıtsııalyq joba júzege asady
ASTANA. KAZINFORM — Qanat Bozymbaev jumys saparymen Atyraý oblysyna baryp, Batys óńirlerin áleýmettik-ekonomıkalyq damytý jónindegi shuǵyl sharalar josparyn, «Aýyl amanaty» jobasyn jáne bıýdjettik josparlaý salasyndaǵy reformalardy júzege asyrý máseleleri boıynsha keńes ótkizdi. Bul týraly Úkimettiń baspasóz qyzmeti habarlady.
Jıynǵa Atyraý oblysynyń ákimi Serik Shápkenov, Batys Qazaqstan oblysynyń ákimi Narıman Tóreǵalıev, Mańǵystaý oblysynyń ákimi Nurdáýlet Qılybaı, Aqtóbe oblysy ákiminiń orynbasary Abzal Abdikárimov, ulttyq ekonomıka vıtse-mınıstri Baýyrjan Omarbekov qatysty.
Bıýdjet kodeksin reformalaý jáne bıýdjettik josparlaýdy Óńirlik standarttar júıesimen (ÓSJ) ushtastyrý máselesi talqylandy. Atalǵan júıe qarjylandyrýdy ınfraqurylym alshaqtyqtary bar óńirlerge basymdyqpen baǵyttaýǵa múmkindik beredi.
Máselen, káriz jelileriniń tozýy Aqtóbe jáne Batys Qazaqstan oblystarynda respýblıkalyq deńgeıden, al Atyraý men Mańǵystaý oblystarynda jylý jelileriniń tozýy el boıynsha ortasha deńgeıden joǵary. Barlyq batys óńirlerde elektr jelileriniń aıtarlyqtaı tozǵany jáne jolmen qamtamasyz etýdiń tómen deńgeıi baıqaldy.
Vıtse-premer ınfraqurylymdyq jobalardy josparlaý kezinde ÓSJ kórsetkishterin eskerip, artta qalǵan eldi mekenderge basym túrde qarjy bólýdiń mańyzdylyǵyn atap ótti.
«Aýyl amanaty» jobasy aıasynda, aýyldardy ornyqty damytý maqsatynda, 2029 jylǵa deıin batys óńirlerde 2,5 myńnan astam ınvestıtsııalyq joba júzege asyp, 26 myńnan astam jumys orny ashylady dep josparlanyp otyr.
Qanat Bozymbaev ákimdikterge 1 shildege deıin joba skrınıngi nátıjeleri boıynsha aýyldyq okrýgterdiń mamandanýyn aıqyndaýdy jáne halyqqa shaǵyn nesıe berý tetikteri boıynsha túsindirý jumystaryn jandandyrýdy tapsyrdy.
Sondaı-aq Batys óńirlerdiń áleýmettik-ekonomıkalyq damýy jónindegi shuǵyl sharalar josparynyń oryndalý barysy boıynsha esepter tyńdaldy.
Jumys sapary aıasynda vıtse-premer Atyraýdaǵy birqatar mańyzdy nysandy aralady: «Atyraý Sý Arnasy» KMK, №5 súzgi stansasy, Atyraý qalasyna kireberis joldyń qurylysy jáne kárizdik tazartý qurylystaryn rekonstrýktsııalaý jumystaryn tekserdi.
Aıta ketelik Oljas Bektenov Geo-Jade Petroleum basshysy Van Ventaomen «Sozaq» ken ornynda gaz óndirý jobasyn júzege asyrý barysyn talqylaǵan edi.