2029 jylǵa deıin «Aýyl amanaty» baǵdarlamasyna 600 mıllıard teńgege jýyq qarajat bólinedi
ASTANA. KAZINFORM – Memleket basshysy aýyldaǵy kásipkerlikti damytý, aýyl sharýashylyǵy kooperatıvterin nyǵaıtý jáne ınfraqurylymdy jetildirý baǵytynda birqatar mańyzdy tapsyrma berdi.
«Aýyldaǵy kásipkerlikti órkendetýge basa mán berý kerek. Aldymen aýyl sharýashylyǵy kooperatıvterin damytýymyz qajet. Osy baǵytta birshama jumys atqaryldy. Onyń paıdaly ekeni de kópshilikke belgili.
Alaıda birlesken sharýashylyqtar ázirge aýyl ekonomıkasynyń tiregi bola almaı tur. Kóbine mundaı kooperatıvterdi birneshe adam ǵana quratyny jasyryn emes. Olar jeke sharýashylyq ıeleri jáne ónim óńdeýshiler arasynda deldal bolyp júredi. Soǵan qaramastan memleketten jeńildikter alady. Ras, mundaı teris áreketterge tyıym salynbaǵan. Biraq bul aýyl halqynyń ál-aýqatyn arttyrýǵa kedergi keltiredi.
Birlestik (kooperatıv) qurý búkil el boıynsha júrgizilýi kerek. Sonda ǵana aýyldaǵy aǵaıyn bul jumystyń ıgiligin kóredi. Jeke sharýalar birige almasa, memlekettiń aýyl sharýashylyǵyn damytý jolyndaǵy bar eńbegi zaıa ketedi. Sondyqtan bul jumysty belsendi túrde qolǵa alýymyz qajet», – dedi Qasym-Jomart Toqaev.
Prezıdent «Aýyl amanaty» jobasynyń tıimdiligine toqtaldy.
«Aýyl amanaty” jobasy óz kásibin damytqysy keletin aýyl turǵyndaryna mol múmkindik berýde. Joba aıasynda eki jyldyń ishinde 20 myńǵa jýyq jumys orny ashyldy. 2029 jylǵa deıin osy baǵdarlamaǵa 600 mıllıard teńgege jýyq qarajat bólinedi», - dedi ol.
Sonymen birge Memleket basshysy aýyldy damytý úshin áleýmettik-kásipkerlik korporatsııalardyń áleýetin tıimdi paıdalaný qajet ekenin aıtty.
«Qazirgi tańda bul korporatsııalardyń aýyl ekonomıkasyna esh kómegi tımeı tur. Men Joldaýymda áleýmettik-kásipkerlik korporatsııalardy tolyqqandy damý ınstıtýtyna aınaldyrý týraly tapsyrma berdim. Úkimet jáne Prezıdent Ákimshiligi bul jumyspen aınalysyp jatyr. Naqty nátıje kútemin.
Osy korporatsııalardyń jáne “Aýyl – el besigi” baǵdarlamasynyń resýrstaryn aýyl bıznesine qajetti ınfraqurylymdy jetildirý úshin jumsaǵan abzal», - deıdi Qasym-Jomart Toqaev.
Prezıdent aýyl ınfraqurylymyndaǵy ózekti máselelerdi de atap ótti.
«Kóptegen aımaqta mal bordaqylaıtyn jáne mal soıatyn oryndar tapshy. Sondaı-aq aýyl sharýashylyǵy ónimin óndirý, saqtaý, tasymaldaý, ótkizý isimen aınalysatyn jáne aýyl sharýashylyǵy tehnıkasy men jabdyqtaryn jóndep, qyzmet kórsetetin servıstik daıyndaý ortalyqtary jetispeıdi.
Al ońtústik óńirde sýarý arnalary men ırrıgatsııa júıelerine qatysty másele – óte ózekti. Tıisti ınfraqurylym bolsa, ákimderdiń jergilikti bıznesti qoldaýǵa jáne ınvestor tartýǵa múmkindigi artady.
Bul baǵytta aýqymdy jumys júrgizý úshin Aımaqtyq standarttar júıesine ózgertý engizý qajet. Jalpy, Úkimet aýyl ekonomıkasyn jandandyrý úshin naqty usynystar ázirleýi kerek», – dedi Memleket basshysy.
Aıta keteıik, Prezıdent tórtinshi deńgeıli bıýdjettiń derbestigin arttyrýdy tapsyrdy.