2029 jylǵa deıin 5 mln adamǵa jasandy ıntellekt daǵdylary úıretiledi – Mınıstr
ASTANA. KAZINFORM – Tsıfrlyq damý, ınnovatsııalar jáne aeroǵarysh ónerkásibi mınıstrligi 2024-2029 jyldarǵa arnalǵan Jasandy ıntellektti damytý tujyrymdamasyn ázirledi. Bul týraly sala mınıstri Jaslan Mádıev aıtyp berdi.
«Memleketterdiń jasandy ıntellektti qoldanýǵa daıyndyǵy Oxford Insights ázirlegen ádistememen anyqtalady. Osy ádistemege sáıkes, Qazaqstan tsıfrlyq áleýet (76%) jáne derekterdiń qoljetimdiligi (74%) kórsetkishteri boıynsha joǵary áleýetke ıe. Biz jasandy ıntellekt salasyndaǵy eldik strategııalyq qujattardyń bolmaýyna baılanysty «paıymdaý» kórsetkishi boıynsha aıtarlyqtaı artta qalyp otyrmyz», - dedi J.Mádıev Úkimettiń búgingi otyrysynda.
Tujyrymdamanyń negizgi maqsaty — jasandy ıntellekt ekojúıesin qurý, ekonomıka jáne memlekettik basqarý salalarynda jasandy ıntellekt tehnologııalaryn engizý. Osy maqsatqa jetý úshin tujyrymdamada kelesi baǵyttar jeke-jeke qarastyrylady: derekter; ınfraqurylym; adamı kapıtal; ǵylymı zertteýler; retteýshi orta, akseleratsııalyq baǵdarlamalar.
«Derekter – jasandy ıntellekt damýynyń negizgi elementteriniń biri. Ózderińiz biletindeı, bul baǵytta úlken jumys atqarylyp jatyr. «Ulttyq aqparattyq tehnologııalar» aktsıonerlik qoǵamy memlekettik organdardyń derekterin Smart Data Ukimet-ke jınaıdy. Oǵan jańartylyp turatyn 93 derekter bazasy (memlekettik organdar, kvazımemlekettik sektor, jeke kásiporyndar, ekinshi deńgeıdegi bankter, joǵary oqý oryndary jáne ǵylymı ortalyqtar) qosylǵan. Osy málimetter úlken derekterdi tereń taldaýǵa jáne soǵan negizdelgen sheshimder qabyldaýǵa múmkindik beredi», - deıdi mınıstr.
Infraqurylymdy damytý úshin Qazaqstanda sýperkompıýterdi ornalastyrý, halyqaralyq áriptestik arqyly derekterdi óńdeý ortalyqtaryn salý, jasandy ıntellekt ulttyq platformasyn qurý jáne talshyqty-optıkalyq baılanys jelilerin damytý sharalary kózdelgen.
«2029 jylǵa deıin aldymyzǵa kelesi maqsattar qoıyldy: 5 mln adamdy jasandy ıntellekt daǵdylaryna úıretý; 500 myń salalyq maman daıarlaý; 5 qazaqstandyq biregeı kompanııa qurý; IT-eksportty 5 mlrd dollarǵa deıin ulǵaıtý; akseleratsııa esebinen ekonomıka sektorlarynda jyl saıyn keminde 25 jasandy ıntellekt ónimderin engizý. Bul josparlardy júzege asyrý jáne jasandy ıntellekt ónimderin ekonomıkaǵa keńinen engizý JІÓ ósýine eleýli úles qosady dep josparlanyp otyr», - dedi J.Mádıev.
