2029 jylǵa deıin 3,3 mln adamdy jumysqa ornalastyrý mindeti tur — mınıstrlik
ASTANA. KAZINFORM — Jyl basynan beri 250 myńnan astam adam jumysqa ornalasty. Bul týraly búgin Úkimet otyrysynda Eńbek jáne halyqty áleýmettik qorǵaý vıtse-mınıstri Asqar Bıahmetov málim etti.
— Orta merzimdi kezeńge kadrlarǵa boljamdy qajettilik 3 mıllıon adamǵa jýyq. Osy derekterdi kásiptik standarttardy bekitý, bilim berý baǵdarlamalaryn ázirleý, bilim berý tapsyrystaryn bólý jáne qaıta daıarlaý júıesin uıymdastyrý barysynda eskerý qajet. Bul ásirese tsıfrlandyrý men demografııalyq ózgerister kezeńinde aıryqsha mánge ıe. Sonymen qatar tsıfrlandyrýdyń jáne tehnologııalyq ózgeristerdiń saldarynan jańa kásipter paıda bolyp jatyr. Máselen, áleýmetti tıýtor, drondar operatory, jasandy ıntellekt mamany jáne basqalar, — dedi Asqar Bıahmetov.
Sonymen qatar ol 2024 jyldan bastap Eńbek naryǵyn damytýdyń 2030 jylǵa deıingi tujyrymdamasy iske asyrylyp jatqanyn eske saldy. Nysanaly baǵdar — 3,8 mln sapaly jumys orny. Aıqyndalǵan ólshemsharttarǵa sáıkestikti kózdeıtin sapaly jumys oryndaryn esepke alý júıesi engizildi. Bul óz kezeginde medıandyq jalaqydan joǵary jalaqyny qamtamasyz etý,
6 aıdan astam merzimge jumysqa ornalastyrý, áleýmettik kepildiktermen jáne qaýipsiz eńbek jaǵdaılarymen qamtamasyz etý.
— Bizdiń aldymyzda 2029 jylǵa deıin 3,3 mıllıon azamatty jumysqa ornalastyrý mindeti tur. Jyl basynan beri 250 myńnan astam adam jumysqa ornalasty, onyń ishinde 38 paıyzy jastar (95,4 myń adam), — dedi vıtse-mınıstr.
Budan buryn habarlanǵandaı, jastardyń eńbek naryǵyna kelýi jylyna 360 myń adamǵa deıin ósedi.