2029 jylǵa deıin 11 myń km temirjol jóndeledi — Kólik mınıstrligi
ASTANA. KAZINFORM — Elimizde 2029 jylǵa deıin 11 myń shaqyrym temirjol jóndeledi. Bul týraly Kólik mınıstrligi Temirjol jáne sý kóligi komıtetiniń tóraǵasy Jánibek Taıjanov aıtty.
— Jolaýshylar men júkterdi úzdiksiz ári qaýipsiz tasymaldaýdy qamtamasyz etý maqsatynda temirjoldardyń jaǵdaıyn jaqsartý jumysy júrgizilip jatyr. 2029 jylǵa deıin temirjol jelileriniń 11 myń shaqyrymyn jóndeý josparlanyp otyr, — dedi ol OKQ alańynda.
Spıkerdiń aıtýynsha, atalǵan baǵdarlama aıasynda 2023–2024 jyldary 2,8 myń shaqyrymnan astam jol jóndelgen, al 2025 jyly 1,48 myń km joldy jóndeý josparlanǵan.
— Bul sharalar Qazaqstandy jahandyq logıstıkalyq tizbekterge ıntegratsııalaý, sondaı-aq transkontınentaldy baǵyttarǵa jańa tranzıttik júk aǵyndaryn tartý maqsatynda basqa memleketterdiń temirjol ákimshilikterimen úılestirilgen jumys júrgizýge úlken múmkindik beredi, — dedi Jánibek Taıjanov.
Elimizde aldaǵy maýsym jáne qyrkúıek aılarynda eki jańa elektropoıyz baǵdary ashylady.
Sondaı-aq áıelderge arnalǵan vagony bar jolaýshylar poıyzynyń sany 12-ge jetti.