2029-2030 jyldary Ulttyq qordy 100 mlrd dollarǵa toltyrý kerek – Jumanǵarın
ASTANA. KAZINFORM – Premer-Mınıstrdiń orynbasary – Ulttyq ekonomıka mınıstri Serik Jumanǵarın Kazinform agenttigine eksklıýzıvti suhbat berdi. Vedomstvo basshysy BIZDIÑ ORTA podkastynda salyq reformasynyń mánin túsindirdi.
— Biz bıýdjet damýyn kótermesek, eshqandaı bolashaq bolmaıdy. Kóbi Úkimet, Ulttyq ekonomıka mınıstrligi tek qana salyq reformasyn kórip tur, sol reforma arqyly óz jaǵdaıyn jasaǵaly jatyr dep oılaıdy. Ol — múldem durys emes, sebebi birinshi baǵyt — bıýdjettik reforma. Prezıdent bıýdjet kodeksine qol qoıdy, sheshilgen másele, - dedi Serik Jumanǵarın áńgime barysynda.
Osy oraıda mınıstr kelesi jyly Parlamentte basqa bıýdjettik joba qaralatynyn málimdedi.
— Salyq reformasynyń maqsaty — salyq fılosofııasyn ózgertý. Úkimet pen kásipkerlerdiń arasynda jańa áleýmettik shart jasasý, salyq bazasyn kóterý. Qarjylyq júıeni turaqtandyrý. Sonymen qatar Ulttyq qordan qarjy alýdy azaıtyp, onyń kólemin 2029-2030 jyldary 100 mlrd dollarǵa deıin toltyrý kerek, ol — bolashaq urpaqqa qalatyn qarajat. Daǵdarys bastalsa, artymyzda tek Ulttyq qor bar, basqa eshteńe joq. Úshinshi másele, naqty sektordy qarjylandyrý. Bıyl «Báıterek» holdınginiń kapıtalyn 1 trln teńgege kóterip, qosymsha 8 trln teńge bólip, naqty sektordyń bıznes jobalaryna qarajat baǵyttap otyrmyz. Bizdiń damý bıýdjetimiz — 2 trln teńge, tórt ese kóbeıtip otyrmyz, ıaǵnı bul — bıýdjetten tys aqsha tabý. Oǵan qosymsha bıyl 1 trln teńgege aqyly joldar salamyz, 1 trln teńgege 585 shaqyrym jańa temirjol salamyz jáne qoldanystaǵy temirjoldar jóndeledi. Sonymen qatar 19 mln sharshy metr turǵyn úı salamyz. Bıznes jobalar tıimdi bolsa, alǵan qaryzdy bıýdjetke qaıtaryp beredi, - deıdi Úkimet basshysynyń orynbasary.
Aıta keteıik, 9 sáýirde Májilis Salyq kodeksiniń jańa jobasyn birinshi oqylymda maquldady.
Salyq kodeksiniń jańa jobasy boıynsha salyq esebin tapsyratyndar sany 30 paıyzǵa qysqarady.
Eske salsaq, qosylǵan qun salyǵy salynatyn aınalymnyń tómengi shegi 40 mln teńge bolady.
Sondaı-aq Serik Jumanǵarın korporatıvtik tabys salyǵynyń mólsherlemesi ósetin salalardy atady.