2028 jyly «Qalamqas» jáne «Hazar» ken oryndaryn ıgere bastaımyz - mınıstr

NUR-SULTAN. QazAqparat – Bıyl jyl sońyna deıin «Qalamqas», «Hazar» ken oryndaryn ıgerýdiń tujyrymdamasy ázirlenip, 2028 jylǵa qaraı ken ıgerýdi bastaý josparlanyp otyr. Bul týraly QR Energetıka mınıstri Maǵzum Myrzaǵalıev málim etti, dep habarlaıdy QazAqparat tilshisi.

«Búginde «QazMunaıGaz» kompanııasy men onyń seriktesteri arasynda atalǵan ken oryndaryn ıgerý tujyrymdamasyn tańdaý boıynsha talqylaý júrip jatyr. Otandyq ónim kólemin arttyrý turǵysynda bul jobalardyń mańyzy zor. Kúndelikti «QazMunaıGazben» birlesken jumys barysynda bul ken oryndarynyń áleýeti óte joǵary ekenine kózimiz jetip otyr. Jyl sońyna deıin ken ornyn ıgerýdiń tujyrymdamasyn tańdaý boıynsha sheshim qabyldanady. 2028 jylǵa qaraı ken ıgerýdi bastaý úshin bıyl jyl sońyna deıin tujyrymdama tańdalyp, sheshim qabyldanady dep kútip otyrmyz», - dedi Maǵzum Myrzaǵalıev elordada ótip jatqan «KIOGE-2021» halyqaralyq munaı jáne gaz kórmesinde tilshilerdiń suraǵyna jaýap bere otyryp.

Eske sala ketsek, qyrkúıekte Mańǵystaý oblysyna jumys sapary barysynda Memleket basshysy Qasym-Jomart Toqaev jalpy quny shamamen 5 mıllıard dollar bolatyn «Qalamqas» jáne «Hazar» iri ken oryndaryn ıgerý jumysyn bastaý jónindegi sheshimin eske saldy.

Sondaı-aq, Prezıdent ken oryndaryn ıgerý jumystaryna jergilikti kompanııalar men kadrlardy barynsha tartýdyń mańyzdy ekenin atap ótti.