2028 jyly Qazaqstannyń memlekettik boryshy 57 trln teńgeden asady — UEM

ASTANA. KAZINFORM — Ulttyq ekonomıka mınıstriligi Qazaqstannyń 2026-2028 jyldardaǵy damý boljamyn jarııalady.

— 2026–2028 jyldar aralyǵynda áleýmettik jáne ınfraqurylymdyq shyǵystardy qarjylandyrý, sondaı-aq ınflıatsııalyq qysymdy tejeý qajettiligimen baılanysty memlekettik boryshtyq mindettemelerdiń birtindep ósýi boljanady. Sonymen qatar, bıýdjettik retteý jáne salyq saıasaty salasyndaǵy reformalar qaryzdyń ulǵaıý qarqynyn baqylaýǵa múmkindik beredi, onyń serpinin ruqsat etilgen makroekonomıkalyq baǵdarlar sheginde saqtaıdy, — dep jazylǵan boljamda.

Qujatta 2026-2028 jyldarǵa arnalǵan úkimettik borysh pen jergilikti atqarýshy organdardyń boryshynan turatyn memlekettik borysh parametrleri bylaı bolatyny boljanǵan:

— 2026 jyly 46 trln 477 mlrd teńge nemese JІÓ-ge 25,3%;
— 2027 jyly 52 trln 520 mlrd teńge nemese JІÓ-ge 25,5%;
— 2028 jyly 57 trln 515 mlrd teńge nemese JІÓ-ge 25%.

Onyń ishinde Úkimettik borysh 2028 jyly 44 trln 956 mlrd teńge, jergilikti ákimdikterdiń boryshy 12 trln 559 mlrd teńge, kvazımemlekettik sektor boryshy 47 trln 108 mlrd teńge bolatyny aıtylǵan.

Al eldiń jalpy ishki ónimi 2025 jyly 161 trln 860,5 mlrd teńge, 2026 jyly 183 trln 788,2 mlrd teńge, 2027 jyly 206 trln 62,3 mlrd teńge, 2028 jyly 229 trln 797,7 mlrd teńge bolatyny aıtylǵan. Boljamda Brent markaly munaıdyń baǵasy 2026-28 jyldary barreline 60 dollar bolady degen esep alynǵan.

Buǵan deıin eldiń memlekettik boryshy 30,5 trln teńgeden asqanyn jazǵan edik. 

Ulttyq ekonomıka mınıstrliginiń dereginshe, Qazaqstannyń memlekettik boryshy byltyr 31,8 trln teńge kóleminde bolsa, bıyl 37,8 trln teńgege jetýi múmkin.