2028 jylǵy Olımpıada: Los-Andjeleste áýe taksı qyzmeti josparlanyp otyr

ASTANA. KAZINFORM — Eger uıymdastyrýshylar óz josparlaryn júzege asyra alsa, 2028 jylǵy Olımpıada oıyndary kezinde kórermender Los-Andjeles aspanynda saıahattap, qalanyń keptelisterinen aýlaq júre alady, dep habarlaıdy VVS.

Qaladaǵy úshinshi Jazǵy Olımpıada oıyndaryna jaýapty LA28 uıymdastyrý komıteti Olımpıada jáne Paralımpıada oıyndary kezinde áýe taksı qyzmetin kórsetý maqsatynda Archer Aviation kompanııasymen seriktestik týraly jarııalady. 

Kompanııa jankúıerlerdi sport alańdaryna jáne keri tasymaldaý úshin áýe apparattary parkin paıdalanýdy josparlap otyrǵanyn resmı túrde málimdedi. 

— Biz adamdardyń Los-Andjeleste qozǵalý tásilin ózgertkimiz jáne Amerıkadaǵy kóliktiń bolashaǵyn qalyptastyratyn mura qaldyrǵymyz keledi. Muny isteý úshin LA28 oıyndarynan artyq ýaqyt joq, — dedi Archer Aviation kompanııasynyń bas dırektory jáne negizin qalaýshy Adam Goldshteın.

Ushatyn taksı ıdeıasy salada burynnan talqylanyp keledi. Olardy ushyrý 2024 jylǵy Parıj Olımpıadasynda josparlanǵan bolatyn, alaıda áýe apparattary Eýropalyq avıatsııalyq qaýipsizdik agenttiginen qajetti sertıfıkat almaǵan. Osyǵan uqsas jaǵdaı AQSh-ta da qalyptasqan: Archer Aviation áli Federaldyq avıatsııa basqarmasynan (FAA) sertıfıkat almaǵan, ıaǵnı onyń ushaqtary kommertsııalyq paıdalanýǵa áli daıyn emes.

Eger kompanııa 2028 jylǵy oıyndarǵa ýaqytynda sertıfıkattaýdan ótip úlgerse, áýe taksıleri negizgi núktelerdi, sonyń ishinde aımaqtyń iri olımpıadalyq arenalaryn baılanystyryp, qala turǵyndary men qonaqtaryna 10-20 mınýttyq reısterdi usyna alady. 

Ázirge mundaı sapardyń aqysy qansha bolatyny belgisiz, degenmen, tutynýshylar áýe taksıine mobıldi qosymsha arqyly tapsyrys bere alatyny belgili.

Budan buryn Olımpıada jáne Paralımpıada oıyndarynyń júldegerleri de syıaqy alatyny habarlandy.