2028 jylǵy Dúnıejúzilik kóshpendiler oıyndary Tatarstanda ótedi
ASTANA. KAZINFORM — Qyrǵyzstan VII Dúnıejúzilik kóshpendiler oıyndaryn ótkizý estafetasyn Tatarstanǵa tapsyrdy. Estafetany tabystaý rásimi VI Dúnıejúzilik kóshpendiler oıyndarynyń Cholpon-Ata qalasynda ótken jabylý saltanatynda ótti. Bul týraly Kabar agenttigi jazdy.
Qyrǵyzstan Mınıstrler kabınetiniń tóraǵasy ári Prezıdent ákimshiliginiń basshysy Adylbek Qasymalıev Tatarstan ókiline eldiń jeti oblysyndaǵy 40 aýdannan jınalǵan sý quıylǵan ydysty tabystady.
VII Dúnıejúzilik kóshpendiler oıyndary 2028 jyly Tatarstan astanasy Qazan qalasynda ótedi dep josparlanǵan.
Eske sala keteıik, VI Dúnıejúzilik kóshpendiler oıyndary Qyrǵyzstanda 31 tamyz ben 6 qyrkúıek aralyǵynda ótti. Oǵan álemniń 100-den astam elinen sportshylar men delegatsııalar qatysty.
Eske sala keteıik, Qazaqstan quramasy Dúnıejúzilik kóshpendiler oıyndaryn jalpykomandalyq esepte birinshi orynmen aıaqtady.
Baıraqty dodanyń qorytyndysy boıynsha qazaqstandyq sportshylar 74 medal jeńip aldy. Onyń ishinde 32 altyn, 20 kúmis jáne 22 qola júlde bar. Jalpykomandalyq esepte 30 altyn medal ıelengen Qyrǵyzstan ekinshi orynǵa, jeti altyn júldesi bar Reseı úshinshi orynǵa turaqtady.
Qazaqstannyń jalpy eseptegi jeńisinen keıin pikir qaıshylyǵy týyndap, Qyrǵyzstannyń Mádenıet, aqparat, sport jáne jastar saıasaty mınıstrligi VI Dúnıejúzilik kóshpendiler oıyndaryndaǵy qorytyndy medal esebine qatysty pikir bildirdi.
Mınıstrlik ókilderiniń aıtýynsha, Kóshpendiler oıyndarynyń tujyrymdamasyna sáıkes, jarys qorytyndysy boıynsha elder arasynda resmı medal jáne jalpykomandalyq esep júrgizilmeıdi.
