2028 jylǵa qaraı Qazaqstanda mashına jasaý kólemi 4,5 esege artady
ASTANA. KAZINFORM – Astanada ótip jatqan Qazaqstan mashına jasaýshylarynyń XII forýmyna 20 elden 1500-den astam qatysýshy jınaldy.
Aýstrııa, Brazılııa, Germanııa, Italııa, Qytaı, Túrkııa, Reseı jáne basqa da elderdiń ókilderi eki kún boıy saladaǵy ózekti máselelerdi, qazaqstandyq mashına jasaý salasynyń keleshegin jáne jańa múmkindikterdi talqylaıdy.
Qazaqstan mashına jasaýshylary odaǵynyń basqarma tóraǵasy Meıram Pishembaevtyń aıtýynsha, Prezıdent tapsyrmasymen 2024-2028 jyldarǵa arnalǵan mashına jasaýdy damytý jónindegi keshendi jospar ázirlendi. Qujatqa sáıkes, óndiris kólemi 4,5 esege, eksport – 3 esege, eńbek ónimdiligi – 2 esege, ınvestıtsııa kólemi – 1,5 esege artýy kerek.
Forýmda Mashına jasaý salasyn damytý Memleket basshysynyń jeke baqylaýynda ekeni aıtyldy. «Ónerkásiptik saıasat týraly» zań qabyldanyp, Ónerkásipti damytý qory quryldy. 2023 jyly Úkimet Mashına jasaýshylar odaǵy usynǵan birqatar bastamany qoldady.
M. Pishembaevtyń aıtýynsha, geosaıası syn-qaterler jaǵdaıynda ishki óndiristik tizbekter men eksporttyq baǵyttardy damytý, jahandyq naryq talaptaryna beıimdelý asa mańyzdy.
Búginde Qazaqstan joǵary tehnologııaly óńdeýshi ónerkásipke basymdyq berip otyr. Alǵash ret onyń JІÓ-degi úlesi taý-ken sektorynan 4,6%-ǵa asyp tústi. Sonymen birge, óńdeýshi ónerkásip qurylymyndaǵy mashına jasaýdyń úlesi 20%-ǵa jetti.
Aıta keteıik, Prezıdent 2029 jylǵa deıin elimizdiń jalpy ishki ónimin 450 mıllıard dollarǵa deıin jetkizý jáne óńdeýshi ónerkásiptegi eńbek ónimdiligin 1,5 esege arttyrý mindetin qoıǵan edi.
Qazaqstan mashına jasaýshylarynyń XII forýmy 24-25 sáýir kúnderi Astanada ótedi. Forým otandyq mashına jasaý salasyn odan ári damytýǵa baǵyttalǵan usynystar men praktıkalyq usynymdar ázirleýdi kózdeıdi.
Sondaı-aq, elordada mashına jasaý jáne metall óńdeý boıynsha «Kazakhstan Machinery Fair 2024» halyqaralyq mamandandyrylǵan kórmesi ótip jatyr.
Buǵan deıin Premer-mınıstr Oljas Bektenov Qazaqstan Prezıdenti Qasym-Jomart Toqaevtyń quttyqtaý sózin oqyp bergen edi.