2028 jylǵa qaraı Qazaqstanda maldyń 90 paıyzy tańbalanady

ASTANA. KAZINFORM — 2028 jylǵa qaraı aýyl sharýashylyǵy jerleriniń keminde 50 paıyzy tsıfrlyq baqylaýǵa alynady. Bul týraly Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıev málimdedi. 

— Agroónerkásiptik keshende tsıfrlandyrý Ornyqty damý maqsattary 2-ni iske asyrýdyń mańyzdy tetigine aınaldy. Fermerlerge sýbsıdııa men memlekettik qoldaý alý boıynsha keńes beretin jasandy ıntellekt kómekshisi engizilip jatyr, — dedi Jaslan Mádıev Senatta Ornyqty damýy salasyndaǵy ulttyq maqsattardyń iske asyrylýyn monıtorıngileý jónindegi parlamenttik komıssııanyń XI otyrysynda.

Sonymen qatar «Elektrondyq agroónerkásip kesheni (e-AÓK)» ekojúıesi qurylyp jatyr, ol Smart Farming tehnologııasyna negizdelgen.

— 2028 jylǵa qaraı aýyl sharýashylyǵy jerleriniń keminde 50 paıyzy tsıfrlyq baqylaýǵa alynady dep josparlanǵan. Bul egin ónimdiligin 20–25 paıyzǵa arttyryp, qurǵaqshylyq pen zııankesterden bolatyn shyǵyndardy azaıtady.

Sonymen qatar, mal basynyń 90 paıyzy RFID-belgiler men jasandy ıntellekt arqyly tańbalanady. Bul sharalar eldiń azyq-túlik qaýipsizdigin nyǵaıtady, — dedi mınıstr.

Osy oraıda ol agroónerkásip keshenin tsıfrlandyrý salany jańǵyrtýǵa, aýyl sharýashylyǵyn turaqty damytý jónindegi jahandyq maqsattarǵa eleýli úles qosatynyn atap ótti.

Budan buryn habarlanǵandaı, búgin Parlament Senatynda Qazaqstannyń Ornyqty damýy salasyndaǵy ulttyq maqsattar men mindetterdiń iske asyrylýyn monıtorıngileý jónindegi parlamenttik komıssııanyń XI otyrysy ótti.