2028 jylǵa deıin mektepterde 1000 stomatologııalyq kabınet ashylady
ASTANA. KAZINFORM — Memleket basshysynyń balalardyń qaýipsizdigin nyǵaıtý, olardyń quqyqtaryn qorǵaý jáne úılesimdi damýyna jaǵdaı jasaý jónindegi tapsyrmasyna sáıkes, jańa oqý jylynan bastap elimizdiń mektepterinde stomatologııalyq kabınetter ashyla bastady.
Sonymen qatar, mektepterde tamaqtanýdyń jańa standarty engizildi. Endi mekteptiń as mázirin uıymdastyrý men onyń sapasyn baqylaý mindeti densaýlyq saqtaý uıymdaryna berildi.
Búgin Oqý-aǵartý mınıstri Ǵanı Beısembaev pen Densaýlyq saqtaý mınıstri Aqmaral Álnazarova elordalyq mektepterde osy jańashyldyqtardyń iske asyrylýyn birlesip tekserdi. Qazirgi ýaqytta tis aýrýlarynyń aldyn alý kabınetteri 150 mektepte ashyldy. Jyl sońyna deıin taǵy 90 kabınet ashý josparlanyp otyr. Al 2028 jylǵa deıin mektepterde 1000 stomatologııalyq kabınetin iske qosý kózdelip otyr. Bul bastama oqýshy sany myńnan asatyn iri bilim berý uıymdaryn qamtıdy.
Eń aldymen, «Keleshek mektepteri» ulttyq jobasy aıasynda jańadan salynǵan mektepterde ashylyp jatyr. Ashylǵan kabınetterde oqýshylarǵa aldyn alý baǵytynda stomatologııalyq kómek kórsetiledi, aýyz qýysy aýrýlaryn erte dıagnostıkalaý júrgiziledi jáne sanıtarlyq-aǵartýshylyq jumystar uıymdastyrylady.
Oqý-aǵartý mınıstriniń aıtýynsha, oqýshylardyń densaýlyǵy men ál-aýqatyn saqtaý — bilim berý júıesiniń basty mindetteriniń biri sanalady jáne bul barlyq taraptyń, onyń ishinde medıtsına mamandarynyń da qatysýyn talap etedi.
— Balalardyń qaýipsizdigi men densaýlyǵyn saqtaý memlekettik saıasattyń basty basymdyǵy. Mektep — árbir bala fızıkalyq jáne rýhanı turǵyda damıtyn qaýipsiz orta bolýy tıis. Saýyqtyrý-pedagogıkalyq tásil arqyly salaýatty ómir saltn qalyptastyrý — sapaly bilim berýdiń ajyramas bóligi, — dedi Ǵanı Beısembaev.
Sonymen qatar, 1 qyrkúıekten bastap mekteptegi tamaqtanýdyń jańa standarty kúshine endi. Densaýlyq saqtaý mınıstri Aqmaral Álnazarovanyń aıtýynsha, bul standartta alǵash ret tuz ben qanttyń mólsherine shekteý belgilendi.
— Mektep medıtsınasyn bilim berý úderisiniń tolyqqandy bóligine aınaldyrýdamyz. Búgin biz salaýatty tamaqtaný standartyna negizdelip jańadan ázirlengen mektep as máziriniń qalaı engizilip jatqanyn kórdik. Endi balalardyń ratsıonynda jańadan daıyndalǵan jáne paıdaly taǵamdar kóbeıdi. Bıyl birneshe mektepte balalarǵa tegin profılaktıkalyq kómek kórsetiletin stomatologııalyq kabınetter ashyldy, — dep atap ótti Aqmaral Álnazarova.
Oqý-aǵartý jáne Densaýlyq saqtaý mınıstrlikteriniń bastamasy ótken oqý jylynan bastaý alǵan. Sol kezde mekteptegi tamaq sapasyna baqylaý kúsheıtildi. Jańa talaptarǵa sáıkes, kún saıyn mázirdiń daıyndalý sapasyn tekserýge mektep meıirbıkeleri de tartyldy.
Aıta keteıik, Memleket basshysynyń tapsyrmasy boıynsha 1–4 synyptyń 1,8 mıllıonnan astam oqýshysy, sondaı-aq áleýmettik osal sanattaǵy 5–11 synyp oqýshylary tegin tamaqpen qamtylǵan.
Buǵan deıin mektepterde stomatologııa kabınetterin ashýǵa ne sebep bolǵanyn anyqtaǵan edik.