2028 jylǵa deıin bıýdjetten tys qarajat esebinen 86 sport kesheni salynady
ASTANA. KAZINFORM — Dene shynyqtyrý men sportty damytýdyń 2023-2029 jyldarǵa arnalǵan tujyrymdamasyna sáıkes, halyqtyń 1 000 adamǵa shaqqanda sporttyq ınfraqurylymmen qamtylýy qazirgi ýaqytta 59,6%-ǵa jetken. Al 2029 jylǵa qaraı bul kórsetkish 65%-ǵa deıin jetkizý josparlanǵan. Bul týraly Týrızm jáne sport mınıstrligi málim etti.
— Jyl saıyn óńirlerde jańa sport ǵımarattary salynyp, eskileri kúrdeli jóndeýden ótkizilip jatyr. 2025 jyly paıdalanýǵa berilgen sport nysandarynyń qatarynda dene shynyqtyrý-saýyqtyrý keshenderi, jabyq fýtbol manejderi, júzý basseınderi, kúres, boks jáne gımnastıka zaldary, sondaı-aq ashyq sport alańdary men vorkaýt aımaqtary bar, — delingen habarlamada.
Erekshe atap óterligi, keıingi jyldary salynyp jatqan sport ǵımarattary men nysandardyń basym bóligi aýyldyq jerlerde boı kóterýde. Mysaly, 2024 jyly paıdalanýǵa berilgen 90 sport nysanynyń 61-i aýyldyq, 29-y qalalyq jerlerde salynsa, 2025 jyly paıdalanýǵa berilgen 147 sport nysanynyń 107-si aýyldyq, 40-y qalalyq jerlerde iske qosylǵan.
Byltyr Aqmola oblysynyń Zerendi aýdanynda 6 myń sharshy metrden asatyn sport kesheni, Pavlodar oblysynyń Baıanaýyl aýdanynda kópsalaly sport kesheni, Qyzylorda qalasynda halyqaralyq standarttarǵa saı jańa stadıon jáne taǵy birneshe sport ǵımaraty el ıgiligine berildi.
— Memleket basshysy Qasym-Jomart Toqaev elimizde sport ınfraqurylymyn jańǵyrtý máselesin turaqty túrde kóterip keledi. Bul baǵyt eldegi buqaralyq jáne kásibı sportty damytýǵa tikeleı áser etedi. Prezıdent tapsyrmasyn oryndaý maqsatynda byltyr elimizde 147 sport kesheni paıdalanýǵa berildi, — dep jazdy vedomstvodan.
Bıyl taǵy 121 nysandy iske qosý josparlanyp otyr. Sport nysandaryn jańǵyrtý jáne jańadan salý jumystary respýblıkalyq, jergilikti bıýdjet, memlekettik-jeke áriptestik jáne bıýdjetten tys qarajat esebinen júrgiziledi.
Sonymen qatar 2026-2028 jyldarǵa arnalǵan jol kartasy aıasynda bıýdjetten tys qarajat esebinen 86 iri joba júzege asyrylmaq.
Aıta keteıik, buǵan deıin Almaty oblysynda qaıtarylǵan aktıvter esebinen 1,1 mlrd teńgege sport kesheni salynǵanyn jazǵan edik.
