2028 jyldyń sońyna qaraı ınflıatsııa 5% maqsatty deńgeıge jaqyndaıdy
ASTANA. KAZINFORM — 2028 jyldyń sońyna qaraı ınflıatsııa 5 paıyzdyq maqsatty deńgeıge jaqyndaıdy. Bul týraly Ulttyq bank tóraǵasy Tımýr Súleımenov aıtty.
— 2027 jylǵa arnalǵan ınflıatsııa boljamy ózgerissiz qaldy. Ol 5,5–7,5 paıyz deńgeıine deıin baıaýlaıdy dep kútiledi. Boljam kezeńinde ınflıatsııanyń birtindep tómendeýine qatań aqsha-kredıt saıasaty, salyq-bıýdjet konsolıdatsııasy jáne Úkimet pen Ulttyq banktiń birlesken sharalary yqpal etedi. Ekonomıkany qoldaý baǵdarlamalary tıimdi iske asyp, otandyq óndiristik áleýet keńeıgen jaǵdaıda, 2028 jyldyń sońyna qaraı ınflıatsııa 5 paıyzdyq maqsatty deńgeıine jaqyndaıdy, — dedi Tımýr Súleımenov.
Ulttyq bank tóraǵasy ınflıatsııalyq táýekelder de bar ekenin ashyq aıtty.
— Olar syrtqy ınflıatsııanyń jedeldeýimen, ınflıatsııalyq kútýlerdiń joǵary bolýymen jáne retteletin baǵalardyń, janar-jaǵarmaıdyń jáne QQS-tyń ósýinen týyndaıtyn janama áserlermen baılanysty. Taǵy bir mańyzdy faktor — kvazımemlekettik sektor arqyly ekonomıkany qarjylandyrý kólemi men sharttary. Mundaı qarjy aǵyndary tym aýqymdy bolsa, ınflıatsııalyq qysymdy kúsheıtip, respýblıkalyq bıýdjettiń nyǵaıý áserin álsiretýi múmkin. Ótken jyldyń qorytyndysy boıynsha mundaı qoldaý kólemi JІÓ-niń shamamen 5 paıyzyna teń boldy. Osyndaı aýqymdy qarjyny ekonomıkaǵa bir mezette quıý, ınvestıtsııalar onsyz da joǵary jaǵdaıda ınflıatsııalyq qysymdy kúsheıtýi múmkin, — dedi ol.
Esterińizge sala ketsek, Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.
