2028 jyldan bastap psıhologtardyń memlekettik tizilimi iske qosylady
ASTANA. KAZINFORM — Elimizde psıhologtardyń memlekettik tizilimi qalyptasady. Oǵan enbegen mamandar psıhologııalyq qyzmet kórsete almaıdy ári ózderin psıholog dep ataýǵa quqy bolmaıdy. Senat «Psıhologııalyq qyzmet týraly» zań aıasynda osy jáne ózge de túzetýlerdi maquldady.
Eńbek jáne áleýmettik áriptestik departamenti dırektorynyń orynbasary Baǵlan Qasenovtiń aıtýynsha, zań jobasyna depýtattar bastamashy bolǵan.
— Zańǵa depýtattar bastamashy boldy. Oǵan áleýmettik jelilerde psevdopsıhologtardyń kóbeıýi sebep, — dedi Baǵlan Qasenov Jibek Joly telearnasynyń «Búgin Live» baǵdarlamasynda.
Baǵlan Qasenovtiń sózinshe, memlekettik tizilim 2028 jyldan bastap qalyptastyrylady.
— Memlekettik tizilimdi 2028 jyldan bastap qalyptastyrý josparlanyp otyr. Oǵan deıin mamandarǵa sertıfıkattaýdan ótip, jańa talaptarǵa daıyndalýǵa múmkindik beriledi. Tizilimge tıisti joǵary bilimi, dıplomy men halyqaralyq sertıfıkattary bar mamandar engiziledi, — dedi spıker.
Jańa zań aıasynda psıhologtardyń kásibı qyzmetine qoıylatyn talaptar kúsheıtilmek.
— Basty jańalyqtardyń biri — psıhologtarǵa arnalǵan kásibı standarttyń engizilýi. Ol mamandardyń bilim deńgeıine, kásibı quzyrettiligine jáne biliktiligine qoıylatyn biryńǵaı talaptardy belgileıdi. Sonymen qatar psıhologtardyń kásibı etıkasynyń biryńǵaı kodeksi bekitiledi, — dedi spıker.
Buǵan deıin Májilis depýtaty Ashat Aımaǵambetov eki aptalyq kýrsty bitirgen psıhologtardyń dáýreni bitkenin aıtqan edi.
