2027 jyly Ulttyq qordyń taza valıýtalyq aktıvteri 78,7 mlrd dollarǵa jetedi
ASTANA. KAZINFORM – 2027 jyly Ulttyq qordyń taza valıýtalyq aktıvteri 78,7 mlrd dollarǵa jetedi. Bul týraly Májiliste Ulttyq ekonomıka vıtse-mınıstri Azamat Ámrın aıtty.
«Ulttyq qordan kepildendirilgen transfert týraly zańda munaıdyń kesimdi baǵasy 2025 jyly barreline 42,3 AQSh dollary, 2026 jyly barreline 41,0 AQSh dollary, 2027 jyly barreline 39,4 AQSh dollary deńgeıinde belgilendi. Osyny eskere otyryp, 2025-2027 jyldary respýblıkalyq bıýdjetke kepildendirilgen transferttiń mólsheri jyl saıyn 2 trln teńge kóleminde aıqyndaldy. Nysanaly transferttiń kólemi Bıýdjet kodeksiniń 23-babynyń talaptaryn eskere otyryp aıqandalǵan. Jalpy, aıtylǵan erejelerdi eskere otyryp, Ulttyq qordyń taza valıýtalyq aktıvteri 2025 jyly 62,2 mıllıard AQSh dollary jáne 2027 jylǵa qaraı 78,7 mıllıard AQSh dollary deńgeıinde boljanady», - dedi vıtse-mınıstr.
Onyń aıtýynsha, respýblıkalyq bıýdjettiń shyǵys bóliginiń parametrleri de bıýdjettik qaǵıdalardy eskere otyryp aıqyndalǵan. Respýblıkalyq bıýdjet shyǵystarynyń ósý qarqyny 2025-2027 jyldary 108,3-109,2 paıyz deńgeıinde turaqtandyryldy. Buǵan deıin onyń qarqyny 2023 jyly 121 paıyzdy qurady.
«Bul rette, respýblıkalyq bıýdjettiń shyǵystary 2025 jyly 25,8 trln teńge, 2026 jyly – 23,2 trln teńge, 2027 jyly – 24,6 trln teńge kóleminde josparlanýda. Fıskaldyq jáne munaı emes tapshylyqtardyń deńgeıi 2025 jyly tıisinshe jalpy ishki ónimge 2,7 paıyzdy jáne 7,3 paıyzdy qurap, 2027 jyly jalpy ishki ónimge 1,9 jáne 4 paıyzǵa deıin tómendeıdi dep boljanýda. Úkimet bıýdjet saıasatynyń yqtımal táýekelderi týraly keshendi kórinisti qamtamasyz etý jóninde sharalar qabyldaýdy jalǵastyrdy. Bul jumys bıýdjettik táýekelder jáne memlekettik qarjynyń uzaq merzimdi turaqtylyǵy týraly taldamalyq esep aıasynda júrgizildi», - dedi Azamat Ámrın.
