2027 jyly UBT formaty ózgerýi múmkin
ASTANA. KAZINFORM — 2027 jyly Ulttyq biryńǵaı testileý formaty ilki joba retinde ózgeriske ushyraýy múmkin. Bul týral Senatta BAQ ókilderiniń saýalyna jaýap bergen Ǵylym jáne joǵary bilim vıtse-mınıstri Gúlzat Kóbenova aıtty.
— Amerıkalyq kompanııamen endi jumys isteı bastaımyz. Bastapqy kezeń protsesi — kelissózder, memorandým jasasý boldy. Bul bir kúnniń ne bir jyldyń jumysy emes ekeni túsinikti. Ol barynsha uzaqqa sozylady jáne kezeń-kezeńmen júzege asyrylady, osyǵan oraı, aldaǵy 2026 jyly UBT-nyń formaty da, mazmuny da ózgermeıdi, — dedi vıtse-mınıstr.
Osy oraıda ol UBT formatyn ózgertý ilki joba retinde 2027 jyldan bastap kezeń-kezeńmen qolǵa alynýy múmkin ekenin aıtty.
— Árıne, bul máselelerdiń bári qoǵamǵa, balalar men talapkerlerge mindetti túrde jetkiziledi, — dedi ol.
Vıtse-mınıstrdiń aıtýynsha, UBT-nyń barlyq test suraqtary birneshe kezeńnen turatyn saraptamadan ótedi. Sodan keıin ǵana UBT-ǵa engiziledi.
— Sarapshylar toby qurylyp, onyń quramyna ǵalymdar, pán muǵalimderi kiredi. Sondyqtan suraqtar jan-jaqty talqylanyp, saraptamadan ótedi. Soǵan keıin ǵana qoldanýǵa jiberiledi, — dedi Gúlzat Kóbenova.
Aıta ketelik 22 jeltoqsanda UBT-ǵa qatysý úshin ótinish qabyldaý bastalatyny týraly jazǵan edik.