2027 jyly Transkaspıı kólik baǵytynyń júk ótkizý kólemi 10 mln tonnaǵa jetedi
ASTANA. KAZINFORM – 2027 jylǵa deıin Transkaspıı halyqaralyq kólik baǵytymen júk tasý kólemin jylyna 10 mln tonnaǵa jetkizý josparlanǵan. Bul týraly Kólik saıasaty departamentiniń dırektory Dinmuhamed Sembaev aıtty.
— Búgingi tańda Transkaspıı halyqaralyq kólik baǵytynyń ótkizý qabileti jylyna 6 mln tonnany quraıdy. Jalpy, sońǵy 5 jylda THKB arqyly tasymaldanǵan júktiń kólemi 6 esege artty. 2024 jyly júk tasymalynyń kólemi 62%-ǵa ósip, 4,5 mıllıon tonnaǵa jetti, — dedi ol Qazaqstannyń eksporttaýshylar forýmynda.
Sondaı-aq spıker aldaǵy 2 jylda bul kórsetkishti 2 eseden astam ósirý josparlanyp otyrǵanyn aıtty.
— Statıstıkalyq derekter kórsetkendeı, bul baǵyt tek tranzıttik fýnktsııany ǵana atqaryp qoımaı, qazaqstandyq ónimdi eksporttaýǵa jáne sheteldik taýarlardy ımporttaýǵa belsendi túrde qoldanylady. Bul ony ulttyq ekonomıkany damytýda negizgi arnalardyń birine aınaldyrady. Atalǵan oń úrdis aldaǵy jyldary da saqtalady dep otyrmyz. 2027 jylǵa deıin bul kólik dáliziniń ótkizý qabiletin jylyna 10 mıllıon tonnaǵa deıin jetkizý josparlanǵan, — dedi Dinmuhamed Sembaev.
Aıta ketsek, Qazaqstan kólik-logıstıkalyq ınfraqurylymdy damytýǵa sońǵy 15 jylda 35 mlrd dollar ınvestıtsııalady.